18 сакавіка ў Беларусі адбылася прэм’ера прапагандысцкага фільму «Чужое неба». Большую яго частку зьнялі падманам, піша газэта «Наша ніва».
Каб атрымаць матэрыял для фільма «Чужое неба», герояў зь Вільні падманулі, сказаўшы, што гэта будзе матэрыял для офісу Сьвятланы Ціханоўскай — выключна для ўнутранага карыстаньня і з мэтай атрыманьня фінансавай дапамогі. Матэрыял зь Беластоку быў зьняты бабруйскім актывістам Уладзімерам Лазаравым, які стаў і адным з герояў фільма: яму яшчэ ў верасьні летась пазванілі ў тэлеграм «свае хлопцы, змагары з Вільні», якія папрасілі падрыхтаваць матэрыял для іх мэдыя. Але ні імёнаў, ні назвы гэтага мэдыя Уладзімер не запомніў і не ўдакладняў.
«Мне сорамна, але я нават не памятаю, хто і як тады назваўся, — прызнаўся ў камэнтары „Нашай Ніве“ Лазараў. — Проста папрасілі зьняць знаёмых беларусаў, расказаць, як яны жывуць. Яны так добра размаўлялі, што як бы сваімі зрабіліся. А ў мяне ж сапраўды шмат знаёмых у розных краінах і гарадах».
Віленскую ж кампанію герояў фільма «апрацоўвалі» два мужчыны, якія назваліся Аляксандрамі. Адзін зь іх (адміністратар) выдаваў сябе за супрацоўніка офісу Ціханоўскай, другі (рэжысэр) сказаў, што зьвязаны з чэскай кінастудыяй Barrandov.
Офіс Ціханоўскай сёньня ўжо аспрэчыў, што мае хоць якое дачыненьне да гэтых здымак. «Наша Ніва» дадаткова накіравала зварот да чэскай студыі, але выглядае на тое, што ў абодвух выпадках замоўшчыкі проста выкарысталі гучныя структуры і брэнды, выдалі сябе не за тых, кім зьяўляюцца на самой справе.
Дзяўчына, якая здымала віленскую кампанію герояў і сама стала адной з гераіняў роліку, расказала «Нашай Ніве», што яны з сябрамі зьвярнуліся па дапамогу ў літоўскую паліцыю, а таксама ў Дэпартамэнт дзяржаўнай бясьпекі з просьбай аб расьсьледаваньні і абароне.
«Плянавалася рэалізацыя праекту, закліканага апісаць праблемы, зь якімі сутыкаюцца беларускія палітычныя ўцекачы. Мы ня супраць агучваць праблемы, бо Літва – гэта дэмакратычная эўрапейская дзяржава, дзе існуе свабода слова і мы спадзяёмся, што тут можна абмяркоўваць цяжкасьці, не асьцерагаючыся рэпрэсій, як гэта адбываецца ў Беларусі.
Але асабістую інфармацыю, якую, як запэўнівалі нас, будуць выкарыстоўваць для паляпшэньня жыцьця беларусаў у Літве, перавярнулі і выставілі пад сьцягам беларускай прапаганды. Да гэтага мы не маем ніякага дачыненьня. Мы пачуваемся так, як быццам нас усіх выкачалі ў брудзе, і ад усяго гэтага проста хочацца плакаць. Абуральная эксплюатацыя ўразьлівых людзей. Мы зьвярнуліся ў дзяржаўныя органы і чакаем іх рэакцыі» – сказала ў інтэрвію «Нашай ніве» беларуская эмігрантка.
Форум