Эдуарда Бабарыку зноў будуць судзіць за «непадпарадкаваньне адміністрацыі калёніі»
Эдуарда Бабарыку ўтрымліваюць у зьняволеньні ўжо больш за чатыры з паловай гады. У ліпені 2024 году яму дадалі да 8 гадоў пазбаўленьня волі яшчэ 2 гады паводле ч. 2 арт. 411 КК (злоснае непадпарадкаваньне адміністрацыі калёніі).
Для адбыцця тэрміна палітвязьня перавялі ў ваўкавыскую калёнію № 11, дзе менш чым за паўгода па ініцыятыве адміністрацыі на яго завялі другую запар справу па ч. 2 арт. 411 КК. Суд пачнецца 20 лютага.
Марыю Калесьнікаву вярнулі з ПКТ у атрад да іншых жанчын
Пра тое, што Марыю Калесьнікаву выпусьцілі з памяшканьня камэрнага тыпу і вярнулі ў адтрад, паведаміла яе сястра Тацяна Хоміч.
«Мы даведаліся, што Марыя не ізаляваная ў калёніі і была вернутая ў атрад да іншых жанчын. Мы спадзяемся, што сувязь з Марыяй адновіцца», — напісала яна.
Марыя доўгі час утрымлівалася ў рэжыме інкамунікада. 12 лістапада 2024 году стала вядома, што яна сустрэлася з бацькам. Апошні раз да гэтага сваякі размаўлялі з Марыяй 18 месяцаў таму. Сустрэча Марыі з татам адбывалася ў турэмнай бальніцы, былыя палітзьняволеныя пазналі антураж месца здымкаў. Невядома, ці яна на той момант праходзіла лекаваньне, ці яе прывялі з памяшканьня камэрнага тыпу, дзе, хутчэй за ўсё, утрымлівалі.
Пасьля сустрэчы з бацькам Марыю зноў пазбавілі сувязі са зьнешнім сьветам, яна ўтрымліваецца ў рэжыме інкамунікада.
Форум