Улады разьлічваюць, што даход дзяржаўнага бюджэту ў 2025 годзе складзе 45,835 мільярда рублёў, а расходы не перавысяць 50,295 мільярда рублёў.
Як адзначаецца ў адпаведным законе, апублікаваным на Нацыянальным прававым інтэрнэт-партале, дэфіцыт у памеры 4,459 мільярда рублёў плянуюць прафінансаваць за кошт унутраных крыніц, зьнешніх крэдытаў і апэрацый зь дзяржаўнымі каштоўнымі паперамі.
Закон таксама вызначыў ліміт унутранага дзяржаўнага доўгу Беларусі на ўзроўні 20 мільярдаў рублёў (сёлета быў на ўзроўні 23,1 мільярда рублёў); унутранага, гарантаванага ўрадам, — на ўзроўні 8 мільярдаў рублёў, як і летась; замежнага дзяржаўнага доўгу — 19,2 мільярда даляраў (сёлета ліміт плянаваўся ў памеры 19 мільярдаў даляраў); замежнага пад гарантыі ўраду Беларусі — 2,1 мільярда даляраў (сёлета — 2,5 мільярда даляраў).
На арганізацыю і правядзеньне выбараў прэзыдэнта, якія адбудуцца 26 студзеня 2025 году, прадугледжана 54,145 мільёна рублёў.
Як заўважыла выданьне «Люстэрка», гэта значна больш, чым у 2020 годзе: тады бюджэт прадугледжваў на гэтыя мэты 36,830 мільёна рублёў.
«Аднак калі паглядзець, якую долю гэтыя сродкі займаюць у расходах, то сытуацыя выглядае інакш. На выбары ў наступным годзе хочуць выдзеліць 0,11% ад усіх расходаў рэспубліканскага бюджэту. Тады як у 2020 годзе гэты паказьнік быў на ўзроўні 0,14%», — заўважыла выданьне.
У той жа час, адзначае «Люстэрка», выніковыя расходы на выбары могуць аказацца як большымі, так і меншымі за першапачаткова запляваныя лічбы.
«У тым жа 2020 годзе ўлады постфактум зьмянілі суму, якую павінны былі выдзеліць на правядзеньне выбарчай кампаніі, і зрабілі яе меншай — 25,482 мільёна рублёў, а на справе патрацілі на 103,7 тысячы рублёў менш за гэты бюджэт», — паведаміла выданьне.
Выбары прэзыдэнта Беларусі адбудуцца 26 студзеня. Перад гэтым будзе датэрміновае галасаваньне. А перад гэтым, з 1 па 25 студзеня 2025 году, — перадвыбарная агітацыя.
Рэгістрацыя кандыдатаў у ЦВК чакаецца 23 сьнежня.
Пасьля 1996 году ніводныя выбары і рэфэрэндумы не былі прызнаныя міжнароднай супольнасьцю.
Прадстаўнікі беларускіх дэмакратычных сілаў за мяжой называюць тое, што адбываецца, «спэцапэрацыяй для ўтрыманьня ўлады», праваабаронцы зьвяртаюць увагу на імітаваньне канкурэнцыі.
Выбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Такое рашэньне ўхвалілі на пасяджэньні Палаты прадстаўнікоў 23 кастрычніка. Паводле заканадаўства, сёмыя прэзыдэнцкія выбары ў Беларусі павінны адбыцца не пазьней за 20 ліпеня 2025 году.
- Аляксандар Лукашэнка ўжо заявіў пра намер працягнуць сваю ўладу над краінай яшчэ прынамсі на пяць год. Гэта будуць ужо сёмыя выбары для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Напярэдадні абвяшчэньня даты галасаваньня амбасадар Расеі ў Беларусі Барыс Грызлоў сказаў, што расейскі бок дапаможа Менску ў выпадку «спробаў дэстабілізацыі» ў часе выбараў, калі Беларусь зьвернецца па такую дапамогу.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада выпусьцілі сумесную заяву, у якой падкрэсьлілі, што цяперашняя электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Раней дэмакратычныя сілы Беларусі ўжо неаднаразова заяўлялі, што будуць дабівацца непрызнаньня гэтых выбараў міжнароднай супольнасьцю.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не былі прызнаныя міжнароднай супольнасьцю, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі.
- Палітычны крызіс, які ўзьнік пасьля выбараў 2020 году ў Беларусі, і шырокамаштабныя рэпрэсіі ў краіне працягваюцца да гэтага часу.
- У турмах Беларусі застаецца каля 1,3 тысячы чалавек, якіх праваабаронцы прызналі палітвязьнямі (колькасьць асуджаных з палітычных матываў значна большая). З 2020 году праваабарончаму цэнтру «Вясна» вядомыя прозьвішчы сама меней 7400 фігурантаў крымінальных палітычных спраў у Беларусі, заведзеных з палітычных матываў. Зь іх 6013 чалавек ужо асудзілі (як мінімум 2336 чалавек — на пазбаўленьне волі, 681 — на «хімію»). Больш за 50 тысяч чалавек затрымлівалі з палітычных матываў.
- У сувязі з пагрозай палітычнага перасьледу Беларусь пасьля 2020 году, паводле розных ацэнак, пакінулі сотні тысяч беларусаў: сацыёляг Генадзь Коршунаў у траўні 2024-га ацэньваў маштаб палітычнай эміграцыі ў 500-600 тысяч чалавек, намесьнік кіраўніка МУС Карпянкоў у кастрычніку 2023 году казаў, што з 2020 году зь Беларусі зьехалі 350 тысяч чалавек.
- У Беларусі ліквідавалі амаль амаль усе палітычныя партыі, засталіся толькі 4 праўладныя партыі. Агулам грамадзкі сэктар краіны, пачынаючы з пасьлявыбарчага пэрыяду 2020 году, страціў ужо сама меней 1838 некамэрцыйных арганізацыяў (сярод іх грамадзкія аб’яднаньні, прафсаюзы, палітычныя партыі, фонды, недзяржаўныя ўстановы, асацыяцыі, рэлігійныя арганізацыі і інш.).
- Пасьля выбараў 2020 году ў Беларусі прызналі «экстрэмісцкімі фармаваньнямі/арганізацыямі» і заблякавалі практычна ўсе незалежныя СМІ, журналісты гэтых мэдыя сутыкнуліся з затрыманьнямі, арыштамі, ператрусамі, адміністрацыйным і крымінальным перасьледам, многія вымушана пакінулі краіну і працягнулі працаваць з-за мяжы. За кратамі ў Беларусі цяпер застаюцца 36 прадстаўнікоў мэдыя.
Форум