Некалькі тыдняў таму па ўсіх рэгіёнах Беларусі пракацілася хваля арыштаў — справа зьвязаная з дваровымі чатамі, якія нібыта спрабавалі аб’яднацца ў арганізацыю. Пра гэта заявіў у этэры дзяржаўнага тэлеканалу СТВ начальнік аддзелу нагляду за выкананьнем заканадаўства аб дзяржаўнай бясьпецы Генпракуратуры Валер Шуляк.
«Сьвежы прыклад, вы закранулі тэму дваровых чатаў. Літаральна два тыдні таму ў Рэспубліцы Беларусь па ўсіх рэгіёнах была выкрыта сетка падобных чатаў, якія спрабавалі аб’яднацца ў арганізацыю. Гэтая спроба ня мела посьпеху. Людзі прыцягнуты да крымінальнай адказнасьці», — прыводзіць словы прадстаўніка Генпракуратуры Reform.
Па версіі пракурора, удзел у дваровых чатах — сур’ёзнае крымінальнае злачынства.
«Артыкул дастаткова сур’ёзны, я ня буду яго агучваць сёньня для захаваньня таямніцы сьледзтва, але да 15 гадоў пазбаўленьня волі», — заявіў Шуляк.
У экстрэмісцкім сьпісе больш за 6500 матэрыялаў
Таксама ў этэры СТВ выказаўся і намесьнік міністра інфармацыі Андрэй Кунцэвіч. Ён адказаў на пытаньне, колькі пазыцый цяпер у Рэспубліканскім сьпісе экстрэмісцкіх матэрыялаў.
«На сёньня ў гэты сьпіс уключаны 6565 матэрыялаў, прычым хачу падкрэсьліць, што траціна з гэтай колькасьці (каля 2000) у гэты сьпіс былі ўключаны ўжо ў 2024 годзе, за няпоўны год», — сказаў ён.
Цяпер Рэспубліканскі сьпіс экстрэмісцкіх матэрыялаў налічвае амаль 1400 старонак. Матэрыялы ў яго дадаюць на падставе судовых рашэньняў і на прапанову розных дзяржаўных органаў. Гэта і зьмесьціва асобных старонак у сеціве, і музыкальныя кампазыцыі, і лёзунгі, і выявы, і іншыя матэрыялы.
Форум