З 11 лістапада літоўская мытня ўзмоцніць кантроль за вывазам тавараў з Эўразьвязу, якія ўваходзяць у групу рызыкі, паведаміла 7 лістапада прэс-служба мытні Літвы.
Мытня Літвы будзе ажыцьцяўляць фізычны кантроль тавараў падвойнага прызначэньня на беларускай мяжы, гаворыцца ў паведамленьні ведамства.
«Адмысловая ўвага будзе надавацца экспарту электронных тавараў, такіх як чыпы, мікрасхемы і іншыя электронныя кампанэнты. Таксама будуць праводзіць узмоцнены кантроль тавараў, на якія распаўсюджваюцца выключэньні ў рэглямэнце санкцыяў, напрыклад, мэдыцынска-дыягнастычнае абсталяваньне, экспарт розных мэханізмаў, іх частак і аналягічныя тавары», — гаворыцца ў паведамленьні.
У літоўскай мытні адзначаюць, што ўзмоцненыя праверкі ўвялі для перадухіленьняў паставак у «краіны-агрэсары» тавараў падвойнага прызначэньня, якія «могуць быць выкарыстаныя ў баях або для вытворчасьці прадметаў, якія выкарыстоўваюцца ў ваенных мэтах».
- Раней Эўразьвяз абмежаваў пастаўкі ў Беларусь шэрагу відаў прадукцыі і тэхналёгій падвойнага прызначэньня, якія маглі або могуць перадавацца ў Расею празь Беларусь у абыход абмежаваньняў, уведзеных супраць расейскіх уладаў і эканомікі. Выключэньні пры пэўнай працэдуры могуць прымяняцца пры экспарце-імпарце тавараў і тэхналёгій, неабходных для мэдыцыны ці фармацэўтыкі, для гуманітарнай сфэры, для сфэры надзвычайных сытуацый або для дзейнасьці дыпляматычных устаноў.
Форум