Паводле апошніх зьвестак, у выніку ўдару расейскай арміі па Запарожжы загінулі 6 чалавек, параненыя яшчэ 23, трое зь іх у вельмі цяжкім стане.
Паводле кіраўніка абласной вайсковай адміністрацыі Івана Фёдарава, Расея нанесла ўдар па аб’екце інфраструктуры, па якім менавіта — чыноўнік не ўдакладніў.
«Запарожжа. Зноў удар расейцаў, ёсьць загінулыя і параненыя. Гвалт трэба спыніць моцнымі дзеяньнямі. Неабходная мацнейшая пазыцыя саюзьнікаў», — напісаў кіраўнік офісу прэзыдэнта Ўкраіны Андрэй Ярмак.
Мінабароны Расеі атаку па Запарожжы не камэнтавала.
Расейскія вайскоўцы апошнім часам амаль штодня наносяць удары па Запарожжы, у тым ліку карэктаванымі авіябомбамі. У кастрычніку зьявіліся паведамленьні ў СМІ, што расейскія войскі могуць рыхтаваць маштабны наступ з мэтай захопу гораду, піша «РБК-Украіна». На днях стала вядома, што расейскія войскі ўзялі пад кантроль пасёлак Леваднае ў Запароскай вобласьці. Узброеныя сілы Ўкраіны гэта пацьвердзілі.
На працягу ночы над Украінай былі зьбітыя 48 з 79 ударных дронаў і дзьве кіраваныя авіяцыйныя ракеты, заявілі ў Паветраных сілах УСУ. Бесьпілётнікі зьбілі ў Адэскай, Кіеўскай, Сумскай, Палтаўскай, Жытомірскай, Чаркаскай, Чарнігаўскай і Хмяльніцкай абласьцях. Яшчэ 30 дронаў былі лякацыйна страчаныя.
Форум