Пра гэта славацкаму агенцтву TASR паведамілі ў канцылярыі кіраўніка дзяржавы.
Служба ў замежнай арміі бяз згоды прэзыдэнта ў Славаччыне — крымінальнае злачынства, за якое вінаватаму пагражае турма. Адно з адхіленых дзейным прэзыдэнтам прашэньняў было пададзенае яшчэ яго папярэдніцы Зузане Чапутавай, але яна не пасьпела яго разгледзець. Сама яна выдала некалькі такіх дазволаў.
Пэлегрыні ў мінулым падтрымліваў вайсковую дапамогу Ўкраіне, але падчас перадвыбарнай кампаніі заявіў, што канфлікт аказаўся невырашальны на полі бою. Ён выступіў за мірныя перамовы і заяўляў, што ягоны супернік на выбарах Іван Карчок хоча ўцягнуць краіну ў вайну з Расеяй.
Перад другім турам выбараў па ўсёй Славаччыне зьявіліся рэклямныя шчыты з партрэтам Пэлегрыні і надпісам: «Славаччына не адправіць ва Ўкраіну ніводнага салдата».
Славаччына — парлямэнцкая рэспубліка. Лідэр партыі, якая перамагла на парлямэнцкіх выбарах, прэм’ер-міністар Робэрт Фіца неаднаразова заяўляў, што выступае за мірнае вырашэньне канфлікту.
Славаччына, якая адправіла Ўкраіне артылерыйскія сыстэмы, зьнішчальнікі МіГ-29 і зэнітныя комплексы С-300, пасьля перамогі Фіца перастала перадаваць зброю Кіеву бязвыплатна. Аднак улады не перашкаджаюць камэрцыйным продажам узбраеньняў і боепрыпасаў.
Форум