Пасьля другога туру прэзыдэнцкіх выбараў у Малдове, перамогу ў іх сьвяткуе дзейная прэзыдэнтка Мая Санду.
Палітык выступіла перад прыхільнікамі, якія сабраліся ў выбарчым штабе Партыі дзеяньня і салідарнасьці (PAS), ад якой Санду балятавалася.
Раней яе супернік, кандыдат ад партыі сацыялістаў Аляксандар Стаяноглу, заклікаў сваіх прыхільнікаў захоўваць спакой, нягледзячы на папярэднія зьвесткі.
Пасьля апрацоўкі 99,9% пратаколаў Санду атрымала 55,4% галасоў выбарнікаў. За Стаяноглу 44,6%.
Яўка на выбарах склала 54,30%. За мяжой найбольш папулярным участкам стаў маскоўскі, у расейскай сталіцы прагаласавалі 4999 грамадзянаў. Крыху меней у італьянскіх Брэшыі і Падуі і румынскім Бухырэсьце.
Спэцслужбы Малдовы напярэдадні выбараў неаднаразова папярэджвалі пра намеры Масквы ўмешвацца ў працэс правядзеньня выбараў у краіне.
На прэзыдэнцкіх выбарах 1 лістапада 2020 году Мая Санду набрала ў другім туры галасаваньня больш за 943 тысячы галасоў, гэта значыць 57,7%, і ўпершыню стала прэзыдэнткай Рэспублікі Малдова.
Улады ў Кішынёве паведамілі пра пачатак расьсьледаваньня адносна «выбарчых каруселяў». У спэцслужбаў краіны ёсьць падазрэньне, што арганізаваны падвоз грамадзянаў адбыўся як мінімум у трох замежных дзяржавах — Беларусі, Турэччыне і Азэрбайджане. Паведамляецца, што грамадзянаў Малдовы арганізавана дастаўлялі на замежныя выбарчыя ўчасткі самалётамі з Расеі.
Старшыня парлямэнту Малдовы Ігар Гросу адзначыў, што «крымінальныя групоўкі не супакойваюцца», імкнучыся паўплываць на хаду выбараў. Ён выказаў падазрэньне, што самалёты ў Баку, Менск і Стамбул аплаціў алігарх Ілан Шор, прарасейскі палітычны дзеяч, які ўцёк з краіны пасьля выстаўленьня яму крымінальных абвінавачаньняў у антыдзяржаўнай дзейнасьці.
Служба інфармацыйных тэхналёгій і кібэрбясьпекі (STISC) заявіла пра кібэратакі. Установа гаворыць пра скаардынаваныя атакі, заяўляючы, што яны ідуць з «шырокага спэктру рэсурсаў, разьмешчаных у розных дзяржавах па ўсім сьвеце». Паводле інфармацыі СМІ ў Малдове, такія атакі ў сеціве сталі прычынай збояў у працы некаторых выбарчых участкаў.
Хто такая Мая Санду
Выпускніца Гарварду і былая супрацоўніца Сусьветнага банку, Мая Санду стала першай жанчынай — прэзыдэнтам Малдовы, здабыўшы пераканаўчую перамогу ў 2020 годзе. Посьпех ёй прынесьлі моцнае праэўрапейскае пасланьне і абяцаньні змагацца з карупцыяй і рэфармаваць судовую сыстэму. Аднак пазьней Санду сутыкнулася з цяжкасьцямі праз праблемы ў эканоміцы, разбуранай каранавіруснай пандэміяй, і з прычыны росту геапалітычнай напружанасьці з Расеяй.
На пасадзе прэзыдэнта Санду адыграла важную ролю ў тым, што ў чэрвені 2022 году Малдова стала кандыдатам у Эўрапейскі Зьвяз. Гэта зрабілася асабліва актуальным пасьля поўнамаштабнага ўварваньня Расеі ва Ўкраіну некалькімі месяцамі раней.
У сваёй перадвыбарнай кампаніі Санду паабяцала падтрымліваць мір, паляпшаць умовы жыцьця (Малдова — найбяднейшая краіна ў Эўропе) і забясьпечыць уступленьне краіны ў ЭЗ да 2030 году.
Рэфэрэндум аб сяброўстве ў ЭЗ праводзіўся адначасова зь першым турам прэзыдэнцкіх выбараў 20 кастрычніка. Пасьля перамогі зь невялікай перавагай прыхільнікаў эўраінтэграцыі Санду заявіла, што Малдова стала аб’ектам беспрэцэдэнтнага махлярства і што «злачынныя групоўкі» і «замежныя сілы» спрабавалі купіць 300 000 галасоў. Аднак вынікаў аспрэчваць ня стала.
Форум