Ва Ўкраіне ў ноч на 16 кастрычніка абвясьцілі паветраную трывогу па ўсёй тэрыторыі краіны. Яна працягвалася 12 гадзін. Расея атакавала Ўкраіну найбольшай колькасьцью дронаў за апошні час.
У Цярнопальскай і Кіеўскай вобласьці пажары
У выніку пацэльваньня дронаў у Цярнопальскай вобласьці загарэлася адно з прамысловых прадпрыемстваў. У тушэньні маштабнага пажару задзейнічалі 57 выратавальнікаў і паліцыянтаў, а таксама 16 адзінак спэцыяльнай тэхнікі.
Раніцай пажар удалося лякалізаваць. Як паведамілі ў мясцовым упраўленьні Дзяржаўнай службы Ўкраіны ў надзвычайных сытуацыях, у выніку пажару ніхто не пацярпеў.
У Кіеўскай вобласьці ад падзеньня аскепкаў дронаў у адным з садоўніцкіх таварыстваў загарэўся прыватны дом, ён цалкам зьнішчаны. Згарэў аўтамабіль, які знаходзіўся побач зь ім. Пашкоджаньні атрымаў яшчэ адзін прыватны дом і гаспадарчыя памяшканьні.
Улады заявілі, што аб’екты крытычнай і сацыяльнай інфраструктуры не пацярпелі, пацярпелых сярод цывільных няма.
Расея ўсё часьцей выкарыстоўвае нявызначаныя дроны разам з баявымі бесьпілётнікамі
У ноч на 16 кастрычніка расейцы атакавалі Ўкраіну 136 дронамі. Як паведамілі ў апэратыўным камандаваньні Паветраных сіл Украіны, усе яны былі запушчаныя з тэрыторыі Расеі.
Згодна з паведамленьнем, на раніцу сродкі супрацьпаветранай барацьбы Ўкраіны зьбілі 68 расейскі бесьпілётнік у Сумскай, Чаркаскай, Кіраваградзкай, Цярнопальскай, Херсонскай, Харкаўскай, Жытомірскай, Данецкай, Днепрапятроўскай, Мікалаеўскай, Кіеўскай, Палтаўскай, Чарнігаўскай і Чарнавецкай абласьцях.
Яшчэ 64 дронаў згубіліся ў выніку ўзьдзеяньня сродкаў радыёэлектроннай барацьбы ў розных рэгіёнах Украіны, два вярнуліся назад у Расею і яшчэ два пацэлілі ва ўкраінскія аб'екты.
Аб дроне, які нібыта зафіксаваны на тэрыторыі Беларусі, у Паветраных сілах Украіны нічога не паведамляюць.
Раней часовы выканаўца абавязкаў начальніка ўпраўленьня камунікацый камандаваньня Паветраных сіл Юры Ігнат у камэнтары выданьню «Українська правда» выказаў думку, што Расея ўсё часьцей выкарыстоўвае разам з баявымі небаявыя танныя дроны, каб на іх рэагавалі ўкраінскія сродкі СПА. Такія дроны робяць з танных матэрыялаў, без выбуховых рэчываў. Яны могуць самастойна падаць і не прыводзіць да разбурэньняў.
У той жа час, паводле яго, дакладна высьветліць, які быў дрон, магчыма толькі на зямлі, па ягоных аскепках.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум