Дата дня
6 кастрычніка 1876 году ў Асташыне на Наваградчыне нарадзіўся Ян Булгак, фотамастак і этнограф.
Дзякуючы Булгаку да нашага часу дайшлі выявы людзей, вёсак і гарадоў, а таксама архітэктурных помнікаў Беларусі, якіх даўно няма ў рэчаіснасьці.
Ян Булгак вядомы ня толькі як майстар краязнаўчай фатаграфіі, але і як пэдагог, бібліёграф, фальклярыст, гісторык мастацтваў, першы беларускі гісторык фатаграфіі. Ён аўтар дзясяткаў артыкулаў пра беларускі фальклёр і краязнаўства («Экскурсіі на Свіцязь», 1910; «Велікодныя песьні на Меншчыне (валачобнікі)», 1911 і інш.), працаў пра мастака Фэрдынанда Рушчыца, дасьледаваньняў і падручнікаў па эстэтыцы і тэхніцы фатаграфіі. Яму належыць адмысловая праца «Пра першых віленскіх фатографаў з XIX стагодзьдзя» (1939) і кніга ўспамінаў «Край дзіцячых гадоў», у якой адлюстравана жыцьцё Наваградчыны канца XIX — пачатку XX ст.
Творчасьць Яна Булгака паўплывала на разьвіцьцё мастацкай фатаграфіі Беларусі, Польшчы і Літвы.
Гэты дзень у гісторыі
1788 — распачаўся Чатырохгадовы Сойм Рэчы Паспалітай (іншая назва — Вялікі Сойм). Сойм правёў шэраг радыкальных рэформаў у эканамічнай, палітычнай і сацыяльнай сфэрах:
- увядзеньне рэкрутчыны па тэрытарыяльным прынцыпе;
- павелічэньне колькасьці войска;
- частковае зраўнаньне ў правах мяшчан са шляхтаю;
- наданьне правоў габрэям і праваслаўным.
3 траўня 1791 году Чатырохгадовы сойм прыняў першую ў Эўропе Канстытуцыю.
1939 — скончылася польская абарончая вайна. Пад Коцкам перад немцамі капітулявала апошняя рэгулярная частка польскай арміі — самастойная апэратыўная група «Палесьсе» пад камандаваньнем генэрала Францішка Клебэрга.
1948 — у сталіцы Туркмэніі Ашгабаце адбыўся трагічны землятрус, у якім загінулі каля 160 тысяч чалавек.
1973 — Эгіпет і Сырыя напалі на Ізраіль — пачатак Вайны Суднага дня.
1991 — створаны Беларускі незалежны прафсаюз.
1996 — Папа Рымскі Ян Павал ІІ бэатыфікаваў 13 падляскіх мучанікаў, якія загінулі ад рук расейскіх жаўнераў у мястэчку Пратулін (цяпер Люблінскае ваяводзтва) 26 студзеня 1874 году, баронячы сваю ўніяцкую царкву ад ператварэньня яе ў праваслаўную.
2022 — адбылася апошняя расейская ракетная атака з тэрыторыі Беларусі па Ўкраіне. Ад першай такой атакі 24 лютага было выпушчана больш за 700 ракет.
2022 — абвешчаныя прысуды ў справе беларускага незалежнага інфармацыйнага агенцтва БелаПАН: галоўнай рэдактарцы і дырэктарцы Ірыне Леўшынай прысудзілі 4 гады калёніі агульнага рэжыму; журналісту Дзьмітрыю Наважылаву — 6 гадоў калёніі ўзмоцненага рэжыму; мэдыямэнэджару Андрэю Аляксандраву — 14 гадоў калёніі ўзмоцненага рэжыму; яго жонцы Ірыне Злобінай — 9 гадоў калёніі агульнага рэжыму.
У гэты дзень нарадзіліся
1887 — Ле Карбюзье, францускі архітэктар і дызайнэр.
1908 — Алесь Мілюць, заходнебеларускі паэт.
У памяці
1677 — Альбэрт Каяловіч, беларускі пісьменьнік, палеміст, гісторык.
1809 — Францішак Бялінскі, генэрал-маёр войска кароннага, пісар вялікі каронны, асьветнік, пэдагог, прыхільнік усеагульнай адукацыі.
1996 — Станіслаў Калясанты Роек, рымска-каталіцкі дзеяч, ксёндз.
2004 — Васіль Мельяновіч, дзеяч паваеннай эміграцыі ў ЗША.
2005 — Алесь Емяльянаў, паэт, удзельнік нацыянальна-дэмакратычнага руху 1980–1990-х.
