Яе словы прыводзіць DW.
Так яна адказала на пытаньне аб закліку прэзыдэнта Ўкраіны Ўладзіміра Зяленскага да сіл NATO зьбіваць расейскія ракеты і беспілётнікі над тэрыторыяй яго краіны гэтак жа, як яны зьбіваюць варожыя ракеты і дроны над тэрыторыяй саюзьніка ЗША Ізраіля.
Сінгх было зададзенае дадатковае пытаньне, ці будзе расцэньвацца як задзейнічаньне войскаў ЗША на тэрыторыі Украіны (boots on the ground) сытуацыя, пры якой расейскія ракеты будуць зьбіваць сродкамі СПА, разьмешчанымі ў Польшчы ці Румыніі? Прэсавая сакратарка Міністэрства абароны ЗША заявіла: «Гэта будзе ўмяшаньнем ( ЗША ў вайну Расеі супраць Украіны. — DW) У дадзены момант у нас ёсьць адчуваньне, што Украіна змагла пасьпяхова абараніць свае гарады, сваё насельніцтва, сваю інфраструктуру ад расейскіх авіяўдараў. І мы зьбіраемся і далей гарантаваць, што ў іх будзе тая падтрымка, якая ім для гэтага патрэбная».
Вайна ва Ўкраіне і канфлікт на Блізкім Усходзе з удзелам Ізраіля — гэта «два розныя пэйзажы і зусім розныя палі бітвы», падкрэсьліла Сінгх.
Яна дадала, што кіраўнік Пэнтагону Лойд Осьцін 3 кастрычніка стэлефанаваўся з міністрам абароны Ўкраіны Рустэмам Умеравым, і яны абмеркавалі разьвіцьцё сытуацыі на фронце, бягучыя апэрацыі ЎСУ і іх патрэбы. Паводле ацэнкі Вашынгтона, украінцы «вельмі пасьпяхова выкарыстоўваюць сродкі супрацьпаветранай абароны і іншыя магчымасьці, каб працягваць адваёўваць свае тэрыторыі», заявіла Сабрына Сінгх.
Заклік Зяленскага да NATO дапамагчы Кіеву са зьнішчэньнем ракет РФ над Украінай
3 кастрычніка Ўладзімір Зяленскі на сумеснай прэсавай канферэнцыі з новым генэральным сакратаром NATO Маркам Рутэ заявіў, што, на яго думку, зьнішчэньне варожых ракет над Ізраілем з дапамогай сілаў СПА NATO «нічым не адрозьніваецца» ад зьнішчэньня ракет РФ і дронаў іранскай вытворчасьці Shahed над Украінай.
«Сумеснае зьбіваньне іранскіх ракет нічым не адрозьніваецца ад зьбіваньня расейскіх ракет, ад зьбіваньня іранскіх Shahed, якія аб’ядноўваюць расейскі і іранскі рэжымы. Больш рашучасьці партнэрам у нашым рэгіёне. Гэта тое, што трэба, каб пакласьці канец расейскаму тэрору. Мы будзем і ў далейшым пераконваць нашых партнэраў у неабходнасьці зьбіваньня расейскіх ракет і дронаў», — заявіў Зяленскі.
Ён сказаў, што Кіеў разьлічвае на абмеркаваньне гэтага пытаньня, паколькі патрабуе вынікаў ужо перад зімой.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум