Армія абароны Ізраілю (ЦАХАЛ) увечары 1 кастрычніка паведаміла, што Іран запусьціў ракеты ў бок Ізраілю.
На тэрыторыі ўсёй краіны абвешчаная паветраная трывога, гучаць сырэны. Армія абароны Ізраілю заклікала ўсіх жыхароў прайсьці ў сховішчы і заставацца там да далейшых паведамленьняў.
Паведамляецца пра выбухі ў цэнтры, на поўдні і ўсходзе Ізраілю. «Выбухі, якія вы чуеце, выкліканыя перахопамі або падзеньнем снарадаў», — патлумачылі ў ЦАХАЛ.
Іранская дзяржаўная тэлевізія перадала заяву Корпусу вартавых Ісламскай рэвалюцыі, у якой гаворыцца, што ў бок Ізраіля запусьцілі «дзясяткі ракет». Корпус вартавых Ісламскай рэвалюцыі таксама папярэдзіў, што Тэгеран распачне новую атаку, калі Ізраіль вырашыцца на адказ.
Штодзённая ізраільская газэта «Едыёт ахронот» (ידיעות אחרונות) піша, што ў бок Ізраіля запушчаныя 100 балістычных і крылатых ракет. ABC News са спасылкай на крыніцы піша, што ЦАХАЛ чакае сумарна 240-250 ракет, якія будуць выпушчаныя двума залпамі па трох авіябазах і штаб-кватэры «Масада».
Крыху раней 1 кастрычніка высокапастаўлены прадстаўнік адміністрацыі ЗША паведаміў цэнтральнай службе Радыё Свабода, што Іран рыхтуецца «найбліжэйшым часам» запусьціць балістычныя ракеты па Ізраілі і папярэдзіў аб «сур’ёзных наступствах», калі гэта адбудзецца.
Амэрыканскі чыноўнік, які гаварыў на ўмовах ананімнасьці, сказаў, што Вашынгтон актыўна падтрымлівае дзеяньні, якія дапамогуць абараніць Ізраіль ад гэтага ўдару. Караблі і самалёты ЗША разьмешчаныя ў рэгіёне, каб дапамагчы Ізраілю ў выпадку нападу. Прамы ваенны напад на Ізраіль будзе мець сур’ёзныя наступствы для Тэгерана, падкрэсьлілі ў амэрыканскай адміністрацыі.
Міністар абароны Ізраіля Ёаў Галант размаўляў зь міністрам абароны ЗША Лойдам Остынам, каб абмеркаваць пагрозу нападу з боку Ірану, гаворыцца ў заяве міністэрства абароны Ізраіля. Яны абмеркавалі «апэратыўную гатоўнасьць Ізраіля абараняць сваіх грамадзян і ваенныя актывы, а таксама пазыцыю сіл ЗША ў рэгіёне», гаворыцца ў заяве.
Іранскія мэдыя да гэтага часу не паведамлялі пра «непазбежны напад» на Ізраіль.
- У ноч на 1 кастрычніка Армія абароны Ізраіля (ЦАХАЛ) аб’явіла аб пачатку «абмежаваных наземных рэйдаў на аснове дакладнай выведнай інфармацыі» супраць аб’ектаў і інфраструктуры групоўкі «Хезбала» на поўдні Лібану. Шэраг СМІ перадалі, што ізраільскія танкі ўвайшлі на лібанскую тэрыторыю. Вайскоўцы рэкамэндавалі эвакуяавацца жыхарам амаль двух дзясяткаў лібанскіх абшчын.
- Сухапутнай апэрацыі Ізраілю папярэднічалі масіраваныя паветраныя ўдары ізраільскага войска па аб’ектах на тэрыторыі Лібану. Падчас рэйдаў былі забітыя некалькі чальцоў «Хезбалы», у тым ліку лідэр групоўкі Хасан Насрала. Улады Лібану заявілі, што ў выніку ўдараў загінулі таксама сотні мірных жыхароў.
- «Хезбала» ў сваю чаргу вяла рэгулярныя ракетныя абстрэлы Ізраіля, у выніку якіх дзясяткі тысячы ізраільцян былі вымушаныя пакінуць свае дамы.
- «Хезбала» зьяўляецца як узброенай групай, так і палітычнай партыяй, якая кантралюе большую частку раёнаў з шыіцкім насельніцтвам на поўдні Лібану. ЗША прызналі «Хезбалу» тэрарыстычнай арганізацыяй, Эўразьвяз прызнаў такой толькі яе ваенізаванае крыло, але не палітычную партыю. Партыя «Хезбала» прадстаўлена ў лібанскім парлямэнце.
Форум