Відэа ягонай размовы зь дзяржаўнымі СМІ распаўсюдзіла прэс-служба Міністэрства энэргэтыкі.
«Мы, як арганізацыя, былі ўцягнутыя ў будаўніцтва гэтай станцыі ад самага пачатку. (...) Мы абмеркавалі з прэзыдэнтам і прэм'ер-міністрам неабходнасьць працягу гэтых ацэначых місій. Па сутнасьці, усё вельмі проста: ёсьць упэўненасьць у гэтай краіне, ёсьць упэўненасьць у суседніх краінах (што таксама вельмі важна), у тым, што гэта АЭС не прынясе ніякіх праблем, што яна пастаўляе чыстую энэргію для гэтай краіны», — сказаў Гросі.
У сваім афіцыйным акаўнце ў сацыяльнай сетцы Х Рафаэль Гросі апублікаваў фота зь візыту на БелАЭС і напісаў, што ён «стаў сьведкам прыхільнасьці станцыі бясьпечнай і надзейнай эксплуатацыі».
МАГАТЭ на сваіх рэсурсах не камэнтавала сустрэчы.
На БелАЭС у дэлегацыі МАГАТЭ прайшла працоўная сустрэча зь віцэ-прэм’ерам Віктарам Каранкевічам і міністрам энэргэтыкі Аляксеем Кушнярэнкам. Каранкевіч на ёй заявіў, што на ўсіх этапах будаўніцтва станцыі МАГАТЭ надавала Беларусі тэхнічную і экспэртную падтрымку:
«Наша краіна ўлічыла ўсе рэкамэндацыі, атрыманыя па выніках ацэначных місіяў Агенцтва, і кіравалася імі, выконваючы нацыянальныя пляны дзеяньняў».
БелАЭС «працуе на эканоміку краіны і задавальняе каля 40% унутраных патрэбаў у электраэнэргіі», дадаў Каранкевіч. Паводле віцэ-прэм’ера, дзякуючы БелАЭС Беларусь «атрымала шэраг канкурэнтных перавагаў і значна ўмацавала энэргэтычную бясьпеку, цалкам адмовілася ад імпарту электраэнэргіі».
Ён таксама нагадаў, што плянуецца «важны праект па будаўніцтве рэспубліканскага пункту пахаваньня радыеактыўных адкідаў» і папрасіў Гросі «садзейнічаньня ў стварэньні гэтага аб’екту». Раней стала вядома, што расейскі нацыянальны апэратар па абыходжаньні з радыеактыўнымі адкідамі павінен у 2025 годзе прапанаваць Беларусі на разгляд тры пляцоўкі для ўзьвядзеньня пункту пахаваньня радыеактыўных адкідаў зь Беларускай АЭС.
Да паездкі на БелАЭС кіраўнік МАГАТЭ Рафаэль Гросі сустрэўся з Аляксандрам Лукашэнкам, які заявіў, што «ў Беларусі няма неабходнасьці ў захопе Чарнобыльскай АЭС».
- Будаўніцтва БелАЭС паблізу Астраўца (Горадзенская вобласьць) завяршылася ўвосень 2023 году. Станцыя пабудаваная паводле расейскага праекту, генэральным падрадчыкам выступіў «Расатам».
- Першы энэргаблёк БелАЭС працуе ў энэргасыстэме Беларусі з 3 лістапада 2020 году, другі — з 13 траўня 2023 году. У прамысловую эксплюатацыю іх ўвялі ў чэрвені 2021 году і лістападзе 2023 году адпаведна.
- Літва неаднаразова выказвала занепакоенасьць наконт бясьпекі БелАЭС. Вясной гэтага году ў Вільні правялі вучэньні дзяржаўнага ўзроўню па гарантаваньні грамадзянскай бясьпекі ў выпадку ядзернай аварыі на станцыі.
Што варта ведаць пра БелАЭС
- Беларуская АЭС ад 2011 году ўзводзілі пад Астраўцом, што ў Горадзенскай вобласьці, за 22 км ад мяжы зь Літвой, за 50 км ад Вільні і за 125 км ад Менску.
- Тэрміны запуску некалькі разоў пераносілі. Першапачаткова запуск плянаваўся на 2018 год, Лукашэнка пазьней заяўляў, што тэрміны сарвала Расея. Урэшце цырымонія запуску АЭС прайшла 7 лістапада 2020 году.
- Для будаўніцтва абраны праект АЭС-2006 — тыповы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту збудаваныя блёкі Новаваронескай АЭС і Ленінградзкай АЭС-2, што працуюць у Расеі.
- БелАЭС будуе расейская дзяржаўная кампанія «Росатом» за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу АЭС у эксплюатацыю, але не пазьней за 1 красавіка 2021 году. Беларусь папрасіла Расею падоўжыць крэдыт на 10 гадоў.
- На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. Праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
- Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычын, каб не будаваць БелАЭС, абвінавачвала беларускія ўлады ва ўтойваньні інфармацыі пра станцыю. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
- Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
- Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць толькі пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
- Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.
- У сакавіку 2023 літоўская выведка заявіла, што Беларусь і «Росатом» у мінулым годзе схавалі інцыдэнты і дэфэкты ў рэактарных сыстэмах на першым і другім энэргаблёках. У Міністэрстве энэргетыкі Беларусі адпрэчылі абвінавачаньні і заявілі, што такі даклад ёсьць «мэтанакіраванай акцыяй па дыскрэдытацыі БелАЭС».
- Паводле словаў фізыка-атамніка Андрэя Ажароўскага, спыніць станцыю зараз будзе вельмі дорага. Пры гэтым ён схільны давяраць паведамленьням літоўскай выведкі. Шэраг ускосных прыкметаў сьведчыць аб тым, што на Астравецкай АЭС дзясяткі тысяч недаробак.
- Ад пачатку працы АЭС у Беларусі і на пачатак лістападу 2023 электрычнасьць падаражэла на 21–22% у залежнасьці ад тарыфу.
- Першы энэргаблёк АЭС сілкуе энэргасыстэму Беларусі з 3 лістапада 2020 году (прамыслова эксплюатуецца з чэрвеня 2021), другі — з 13 траўня 2023 году.
- З 26 ліпеня другі блёк АЭС спынілі дзеля рамонту, які назвалі плянавым. Ранейшыя рамонты на доўгія месяцы спынялі працу станцыі. Першы блёк БелАЭС ужо прайшоў два плянава-папераджальныя рамонты. У 2022 годзе ён спыняўся для гэтых мэтаў на 198 дзён, у 2023-м — на 68 дзён.
- У жніўні новым міністрам энэргетыкі замест Віктара Каранкевіча стаў Аляксей Кушнарэнка. А былога намесьніка Каранкевіча Міхаіла Міхадзюка, які непасрэдна кантраляваў АЭС, у гэтым жа месяцы пачалі судзіць за атрыманьне хабару.
- 26 жніўня намесьнік міністра энэргетыкі Дзяніс Мароз заявіў пра падрыхтоўку ведамствам справаздачы перад урадам аб мэтазгоднасьці пабудовы другой АЭС.
Форум