«Хезбала» 25 верасьня заявіла, што нанесла ракетны ўдар па горадзе Тэль-Авіў, які месьціцца ў цэнтральнай частцы Ізраіля. Гэта адбылося першы раз за час апошняга абвастрэньня канфлікту паміж Ізраілем і «Хезбалой». Мэтай удару, як сьцьвярджаецца, была штаб-кватэра ізраільскай выведкі «Масад».
Ізраільскія вайскоўцы заявілі, што перахапілі ракету, якая ляцела на Тэль-Авіў, і падкрэсьлілі, што яна была выпушчаная па жылым раёне, дзе няма штаб-кватэры «Масада». Таксама паведамляецца пра новыя абстрэлы поўначы Ізраілю. Ёсьць пацярпелыя.
Ізраіль, у сваю чаргу, працягвае наносіць удары па Лібане. Цэлямі Арміі абароны Ізраілю зьяўляюцца як паўднёвыя раёны, дзе разьмешчана большасьць базаў «Хезбалы», так і раёны на поўнач ад Бэйруту. Паводле інфармацыі Reuters, галоўным мэтамі ізраільскіх удараў зьяўляюцца члены вышэйшага камандаваньня «Хезбалы», яе ракетны арсэнал, а таксама падземныя тунэлі.
Паводле зьвестак лібанскіх уладаў, да сярэдзіны дня 25 верасьня колькасць загінулых у выніку гэтых удараў перавысіла 20. Агулам з панядзелка 23 верасьня, калі Ізраіль пачаў масіраваныя ўдары па Лібане, паводле зьвестак мясцовых уладаў, загінулі амаль 600 чалавек.
25 верасьня амбасада Беларусі ў Сырыі апублікавала паведамленьне, у якім заклікала беларусаў ўстрымацца ад паездак у Лібан, а тым, хто ўжо там знаходзіцца, пакінуць краіну любымі магчымымі спосабамі. З такой рэкамэндацыяй беларускія дыпляматы выступілі «ў сувязі з абвастрэньнем ваенна-палітычнага становішча, якое працягваецца».
«Беларусам, якія жывуць ці знаходзяцца ў цяперашні час у Лібане, рэкамэндуем пакінуць краіну камэрцыйнымі рэйсамі. У выпадку немагчымасьці выкарыстоўваць наяўныя авіязносіны рэкамэндуем пераехаць на больш бясьпечныя тэрыторыі, у прыватнасьці грамадзянам, якія знаходзяцца ў паўднёвых рэгіёнах Лібанскай Рэспублікі», — паведамілі ў амбасадзе.
- Цяперашняе абвастрэньне канфлікту паміж Ізраілем і «Хезбалой», якія варагуюць ужо дзесяцігодзьдзі, пачалося ў кастрычніку 2023 году, пасьля пачатку вайны ў сэктары Газа.
- Асабліва абвастрылася сытуацыя на мінулым тыдні, калі ў Лібане на працягу двух дзён выбухалі сродкі сувязі, якія належалі чальцам «Хезбалы». Паводле крыніц Reuters, у выніку гэтых нападаў каля 1500 баевікоў «Хезбалы» атрымалі цяжкія раненьні — шматлікія страцілі зрок або пазбавіліся верхніх канцавінаў. Загінулі дзясяткі людзей, сярод якіх былі і мірныя жыхары. Ізраіль афіцыйна ня ўзяў на сябе адказнасьць за выбухі.
- Як адзначаюць СМІ, нават аднаразовая страта паўтары тысячы чалавек, аднак, ня стала фатальным ударам для «Хезбалы», у шэрагах якіх, паводле ацэнак амэрыканскай выведкі, каля 50 тысяч узброеных байцоў.
- «Хезбала» карыстаецца значным уплывам у Лібане, які мяжуе з Ізраілем на поўдні. Групоўка, якая карыстаецца падтрымкай Ірану, выпусьціла ракеты па Ізраілі на наступны дзень пасьля нападу на яго палестынскай групоўкі ХАМАС, прызнанай тэрарыстычнай у ЗША і ЭЗ, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуявалі з прымежных раёнаў з абодвух бакоў.
Форум