Як адзначаецца ў афіцыйным паведамленьні ўраду, такое рашэньне ўхвалілі на пасяджэньні 25 верасьня, дэнансавалі таксама аналягічнае пагадненьне з Расеяй.
«Улічваючы беспрэцэдэнтную ваенную агрэсію Расеі і яе саўдзельніцы Беларусі супраць Украіны, грубае парушэньне міжнароднага права, а таксама тое, што на практыцы транспамежная гандлёва-эканамічная супраца з гэтымі дзяржавамі цалкам прыпынена і немагчымая, мэтазгодна дэнансаваць пагадненьні», — заявіла міністар фінансаў Гінтары Скайсьце.
Ад пачатку ваеннай агрэсіі Расеі супраць Украіны літоўская мытня практычна не супрацоўнічала з мытнымі службамі Расеі і Беларусі і ніякай інфармацыяй не абменьвалася. Двухбаковыя пагадненьні аб супрацы і ўзаемадапамозе ў галіне мытнай дзейнасьці, якія ўрад заключыў яшчэ да ўступленьня Літвы ў Эўрапейскі зьвяз, таксама ня маюць больш практычнага значэньня, таму што мытная супраца належыць да выключнай кампэтэнцыі ЭЗ, адзначылі ва ўрадзе Літвы.
Цяпер рашэньне аб дэнансацыі Літва накіруе ў Расею. Дакумэнты страцяць моц праз паўгоду пасьля атрыманьня другім бокам гэтага паведамленьня. Датычна дамовы зь Беларусьсю пастановы ўраду Літвы пра дэнансацыю недастаткова. Гэтае рашэньне павінны ўхваліць прэзыдэнт і парлямэнт краіны.
У сярэдзіне жніўня Міністэрства фінансаў Літвы распрацавала і перадала на разгляд ураду праекты пастаноў аб разрыве дамоваў зь Беларусьсю і Расеяй аб супрацы ў мытнай сфэры.
Літва падпісала дамову зь Беларусьсю аб супрацы ў барацьбе з парушэньнямі мытнага заканадаўства ў ліпені 1996 году ў Вільні, а з Расеяй аб супрацы і ўзаемнай дапамозе ў галіне мытнай дзейнасьці — у лютым 1995 году ў Маскве.
Форум