Васкрасенскі сьцьвярджае, што Менск прапанаваў асабіста кіраўніку МЗС Польшчы Радославу Сікорскаму, каб той вывез журналіста-палітвязьня Анджэя Пачобута.
«Я тэлефаную бясконца былому часоваму паверанаму Вайцяхоўскаму, — казаў прапагандыст у стрыме ў Рыгора Азаронка. — Ён не падымае слухаўку. Я напісаў Сікорскаму публічна ў сацыяльнай сетцы: „Забірай, забірай, падымай зад і забірай“. Як ты думаеш, мы за кімсьці будзем бегаць з гэтым Пачобутам? Не. Значыць, ён адседзіць увесь тэрмін».
На гэтую заяву Эўрарадыё атрымала адказ Міністэрства замежных спраў Польшчы: «Паведамляем, што прапанова, якую чарговы раз прадставіў калябарант беларускага рэжыму, ня ўпісваецца ў ніводзін канон двухбаковых адносінаў».
- Анджэй Пачобут — адзін зь лідэраў незалежнага Саюзу палякаў Беларусі. Яго затрымалі 25 сакавіка 2021 году. За публікацыю пра падзеі верасьня 1939 году журналіста абвінавацілі ў «распальваньні варожасьці па нацыянальнай прыкмеце» — так улады ацанілі тое, што ён назваў агрэсіяй напад СССР на Польшчу.
- Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
- Пачобут быў асуджаны на 8 гадоў калёніі ўзмоцненага рэжыму. Палітвязьню прапаноўвалі напісаць прашэньне аб памілаваньні, але ён адмовіўся.
Форум