Пра гэта паведамілі амэрыканскія вайскоўцы, назваўшы напады «безразважнымі тэрарыстычнымі актамі», піша «Голас Амэрыкі».
Атакавалі танкер Amjad, які ішоў пад сьцягам Саудаўскай Арабіі, і танкер Blue Dragon I, які ішоў пад сьцягам Панамы.
Як паведамляе Reuters, увечары ў панядзелак хусіты ўзялі на сябе адказнасьць за атаку на Blue Lagoon, аднак не згадалі пра саудаўскі танкер.
Цэнтральнае камандаваньне ЗША паведаміла, што хусіты атакавалі танкеры дзьвюма балістычнымі ракетамі і бесьпілётнікам-камікадзэ, нанёсшы ўдар па абодвух суднах. Як заявіла камандаваньне, Amjad перавозіў каля 2 мільёнаў барэляў нафты.
Дзьве крыніцы Reuters паведамілі агенцтву, што ў момант удару танкеры ішлі побач, але змаглі працягнуць плаваньне, не атрымаўшы сур’ёзных пашкоджаньняў. Таксама абышлося без ахвяр. Пры гэтым адна з крыніц агенцтва ўсумнілася ў тым, што Amjad быў прамой цэльлю ўдару.
У асобнай заяве Цэнтральнага камандаваньня гаворыцца, што амэрыканскія вайскоўцы пасьпяхова зьнішчылі дзьве ракетныя сыстэмы ў падкантрольным хусітам раёне Емэна. У заяве адзначаецца, што гэтыя сыстэмы «несьлі непасрэдную пагрозу» амэрыканскім і кааліцыйным сілам, а таксама гандлёвым суднам у рэгіёне.
Хусіты наносяць удары ракетамі і бесьпілётнікамі па суднах у Чырвоным моры зь лістапада 2023 году. Яны сьцьвярджаюць, што дзейнічаюць у знак салідарнасьці з палестынцамі ў сэктары Газа, на тэрыторыі якога Ізраіль вядзе баявыя дзеяньні ў адказ на напад ХАМАС 7 кастрычніка 2023 году.
Форум