Расея з пачатку ваеннага ўварваньня ва Ўкраіну змагла атрымаць гатоўкай каля 2,3 мільярда даляраў і эўра, нягледзячы на забарону ЗША і Эўразьвязу ўвозіць банкноты на расейскую тэрыторыю.
Як паведаміла агенцтва Reuters з спасылкай на аналіз мытных дакумэнтаў, гэтыя лічбы сьведчаць, што Расея змагла абысьці санкцыі, якія заблякавалі перадачу гатоўкі ў далярах і эўра.
«Мытныя зьвесткі, атрыманыя ад камэрцыйнага пастаўніка, які запісвае і зьбірае інфармацыю, паказваюць, што гатоўку ўвозілі ў Расею з краін, уключна з ААЭ і Турэччынай, якія не ўвялі абмежаваньні на гандаль з Расеяй. Краіна паходжаньня больш чым паловы ад агульнай колькасьці гатоўкі не была пазначана ў запісах», — адзначаюць журналісты агенцтва.
Летась у сьнежні ўрад ЗША прыгразіў штрафнымі санкцыямі фінансавым установам, якія дапамагаюць Расеі абыходзіць санкцыі, і за 2023 і 2024 гады ўвёў санкцыі супраць кампаніяў з трэціх краін.
У 2022 годзе ў Расеі пачалі называць даляр і эўра «таксычнымі», калі шырокія санкцыі скарацілі яе доступ да сусьветнай фінансавай сыстэмы, перашкаджаючы сплатам і гандлю. Каля 300 мільярдаў даляраў золатавалютных рэзэрваў Цэнтрабанку Расеі ў Эўропе замарозілі.
Форум