Вялікая Брытанія ў гадавіну прэзыдэнцкіх выбараў 2020 году ў Беларусі пашырыла санкцыі на 4 беларускіх чыноўнікаў і 3 прадпрыемствы, а таксама абвясьціла пра выдзяленьне сродкаў на праваабарончую дзейнасьць.
«Праз чатыры гады пасьля жорсткіх сцэнаў, сьведкамі якіх мы сталі ў Беларусі, бесьперапынныя рэпрэсіі Лукашэнкі супраць грамадзянскай супольнасьці не паказваюць ніякіх прыкмет паслабленьня: больш за 40 000 грамадзянаў арыштаваныя па сфабрыкаваных палітычных абвінавачаньнях, грамадзянская супольнасьць і незалежныя СМІ растаптаныя, а рэжым не паважае правы чалавека. Мы падтрымліваем народ Беларусі ў яго імкненьні да свабоды і дэмакратыі і заклікаем рэжым неадкладна і безумоўна вызваліць усіх палітычных зьняволеных», — заявіў брытанскі міністар замежных спраў Дэйвід Лэмі.
Згодна з апублікаваным дакумэнтам, санкцыйны сьпіс папоўнілі:
Аляксей Лазарэнка, начальнік ПК (папраўчай калёніі) № 15;
Андрэй Пальчык, былы начальнік ПК № 1;
Філіп Стурчанка, начальнік ПК № 3;
Дзяніс Талсьцянкоў, начальнік ПК № 4.
У заяве брытанскага ўраду адзначаецца, што ўсе чацьвёра «нясуць адказнасьць за ўдзел, падтрымку і спрыяньне ўчыненьню сур’ёзнага парушэньня правоў чалавека, рэпрэсіі супраць грамадзянскай супольнасьці і дэмакратычнай апазыцыі, а таксама дзеяньні супраць дэмакратыі і правоў чалавека ў Беларусі».
Сярод новых падсанкцыйных юрыдычных асоб:
- Адкрытае акцыянэрнае таварыства «НДІЭВМ» (Навукова-дасьледчы інстытут электронных вылічальных машын),
- Адкрытае акцыянэрнае таварыства «Станкагомель»,
- Таварыства з абмежаванай адказнасьцю «Рухсерваматор».
Санкцыі ў дачыненьні да «Станкагомеля» і «Рухсерваматора» ўведзеныя ў сувязі з вытворчасьцю станкоў і інструмэнтаў, якія выкарыстоўваюцца расейскім ВПК. НДІЭВМ працуе на патрэбы беларускага абароннага комплексу.
Санкцыі прадугледжваюць замарозку актываў і забарону на ўезд у Вялікую Брытанію.
Акрамя таго, брытанскі ўрад вылучыць 2,5 млн фунтаў стэрлінгаў у бягучым фінансавым годзе на падтрымку дзейнасьці ў галіне правоў чалавека і грамадзянскай супольнасьці ў Беларусі, у тым ліку далейшае фінансаваньне Міжнароднай плятформы адказнасьці. Размова ідзе пра кааліцыю, «якая зьбірае, правярае і захоўвае доказы грубых парушэньняў правоў чалавека, якія ўяўляюць сабой злачынствы супраць міжнароднага права, меркавана ўчыненыя ўладамі Беларусі».
Форум