Пікет у абарону тэлеканалу «Белсат» прайшоў увечары 8 жніўня каля канцылярыі прэм’ер-міністра Польшчы Дональда Туска. Удзельнікі акцыі трымалі ў руках партрэты палітзьняволеных беларускіх журналістаў.
Ініцыятарам акцыі выступіў беларускі палітык Зянон Пазьняк.
У межах рэарганізацыі канал «Белсат» перастане быць самастойнай адзінкай у структурах Польскай тэлевізіі. Плянуецца, што каналы, якія працуюць на беларускай, расейскай і ўкраінскай мовах, будуць трансьлявацца пад уласнымі брэндамі. Кожны зь іх будзе мець шэсьць гадзін трансьляцыі цягам дня, нагадала «Польскае радыё».
TVP падало заяву ў пракуратуру аб падазрэньні былой дырэктаркі тэлеканалу «Белсат» і фактычна яго заснавальніцы Агнешкі Рамашэўскай-Гузы ды іншых адказных асобаў у зьдзяйсьненьні злачынстваў, у тым ліку прычыненьня фінансавай шкоды і махлярстве.
Рамашэўская адпрэчвае гэтыя абвінавачаньні. Яна падкрэсьлівае, што, сярод іншага, у выпадку рэарганізацыі каналу Польшча страціць эфэктыўны інструмэнт уплыву.
Раней кіраўніцтва «Белсату» выступіла з заявай, у якой патлумачыла, дзеля чаго наймала фірму праграмістаў, і адзначыла, што на праграмным забесьпячэньні TVP немагчыма было б працаваць настолькі разнастайна, як канал рабіў гэта цягам некалькіх гадоў, разьвіваючы розныя мультымэдыйныя плятформы.
На пікеце ў Варшаве нагадалі, што сярод 37 працаўнікоў прэсы, якія знаходзяцца за кратамі ў Беларусі, ёсьць і супрацоўнікі «Белсату», якія пацярпелі за сваю прафэсійную дзейнасьць, атрымаўшы палітычна матываваныя прысуды.
На пікеце выступалі настаўнік і суарганізатар беларускіх акцый Васіль Плешкуноў, прадстаўнік моладзевай арганізацыі «Рух» «Ігнась», намесьнік дырэктара TVP Міхал Бранятоўскі, прадстаўніца Аб’яднанага пераходнага кабінэту ў справах нацыянальнага адраджэньня Аліна Коўшык, палітыкі Алена Дзядзюля, Вячаслаў Сіўчык, Зянон Пазьняк і былая дырэктарка каналу Агнешка Рамашэўская-Гузы.
На акцыі прынялі рэзалюцыю са зваротам да міністра замежных спраў Польшчы Радослава Сікорскага. Яе адразу накіравалі на электронную пошту ў бюро кіраўніка МЗС, піша канал Пазьняка.
У дакумэнце адзначаецца, што апошнія падзеі могуць пакласьці канец 17-гадовай дзейнасьці каналу. Прычынаў зьнішчэньня каналу заяўнікі не разумеюць, бо дзейнасьць «Белсату» адпавядае беларускім і польскім нацыянальным інтарэсам.
У звароце да міністра Сікорскага беларусы і палякі адзначылі, што спадзяюцца на скасаваньне пляну перафарматаваньня «Белсату», і выказалі надзею, што канал будзе працаваць як раней. Яны просяць польскія ўлады працягнуць далейшае функцыянаваньне тэлеканалу.
БАЖ і Прэс-клуб Беларусь таксама выступілі з адмысловым зваротам у абарону «Белсату».
«Мы вельмі занепакоеныя тым, што ў выніку зьменаў, якія праводзяцца на тэлеканале, цяперашні „Белсат“ ператворыцца ў адну з трох моўных адзінак, што будуць весьці трансьляцыю па чарзе на адным канале. Такім чынам, беларусы ўнутры краіны могуць згубіць адзіную тэлевізію на роднай мове, якую сёньня маюць магчымасць уключыць у любы момант, каб пачуць і пабачыць навіны, якіх яны больш нідзе не атрымаюць. У той жа час украінцы і расейцы маюць доступ да розных крыніцаў незалежнага тэлевізіі. У беларусаў ёсьць толькі „Белсат“.
У выніку беларусы могуць апынуцца ў яшчэ большай пастцы расейскай прапаганды і аддаліцца ад Эўрапейскага зьвязу. Мы хвалюемся, што 17-гадовая праца „Белсату“ і высілкі польскай дзяржавы па дэкалянізацыі беларусаў будуць страчаныя ў цяжкі для Беларусі і сьвету час. Тым больш што ва ўмовах вайны Расеі супраць Украіны і павелічэньня інфармацыйных узьдзеяньняў з боку крамлёўскіх сілаў „Белсат“ застаецца важным фарпостам для бясьпекі Польшчы і ўсёй Эўропы.
Мы бачым, што прадстаўнікі рэжыму ўжо выкарыстоўваюць гэтую нагоду для дэматывацыі беларусаў, павелічэньня разрыву паміж беларускім грамадзтвам і грамадзтвам Польшчы і Эўропы, страты надзеі на далучэньне Беларусі да дэмакратычнага сьвету».
Форум