Аляксандар Лукашэнка заявіў на нарадзе ў Менску пра неабходнасьць дывэрсыфікацыі экспарту:
«Мы дамаўляліся пра тое, што яйкі ў адзін кошык класьці ні ў якім выпадку нельга. Чым больш кошыкаў, тым лепей. Таму намалявалася далёкая дуга», — сказаў Аляксандар Лукашэнка на нарадзе аб пытаньнях разьвіцьця беларускай прамысловасьці.
Як адзначаецца на ягоным афіцыйным сайце, Лукашэнка назваў Расею і Кітай асноўнымі партнэрамі Беларусі.
«Гэта нашыя традыцыйныя партнэры. Гэта наш „якар“, мы заякарыліся. І калі нехта мяркуе, што „вось мы сыдзем з Расеі і Кітаю, заўтра нас прымуць з распасьцёртымі рукамі“, — лухта поўная. Так, мы невялікая экспартная эканоміка. Але варта разумець, што гэта мільярды даляраў. Канкурэнцыя сур’ёзная, і з нашымі таварамі нас нідзе ніхто асабліва не чакае. Таму Расея і Кітай, асабліва Расея, — гэта наш традыцыйны рынак. Эканоміка, тут нікуды не падзецца», — сказаў ён.
У паведамленьні адзначаецца, што «Беларусь пасьпяхова разьвівае дачыненьні і зь іншымі дружалюбнымі краінамі, не губляюцца кантакты з Эўрапейскім Зьвязам».
«Гэта нашы суседзі — Эўрапейскі Зьвяз. Зь імі трэба знайсьці шляхі супрацы. Калі ім трэба нешта набыць, а нам трэба нешта прадаць на іхным рынку, — гэта ўзаемавыгадны інтарэс. Як бы палітыкі ні спрабавалі стварыць бар’еры, калі бізнэсу трэба, ён знойдзе шляхі для таго, каб прабіцца на тыя ці іншыя рынкі», — заявіў Лукашэнка.
Паводле яго, уступ Беларусі ў Шанхайскую арганізацыю супрацоўніцтва «адкрывае абсалютна ўнікальныя магчымасьці па прасоўваньні прамысловай прадукцыі ў краіны ШАС».
«І варта шырока разьвіваць і гэтыя кірункі. Гэта дадатковае вакно ў гэтыя краіны», — перакананы ён.
Эўрапейскі Зьвяз з 2020 году пачаў сыстэмна ўводзіць санкцыі супраць Аляксандра Лукашэнкі, чыноўнікаў і дзяржаўных прадпрыемстваў за фальсыфікацыю вынікаў прэзыдэнцкіх выбараў. Пазьней Эўразьвяз пашырыў свае санкцыі — за стварэньне мігранцкага крызісу на мяжы з Польшчай, Літвой і Латвіяй, а таксама за падтрыманьне Лукашэнкам расейскага ваеннага ўварваньня ва Ўкраіну, якое адбылося ў тым ліку і з тэрыторыі Беларусі.
Да Шанхайскай арганізацыі супрацоўніцтва Беларусь далучылася ў ліпені 2024 году.
Санкцыі Эўразьвязу адносна Беларусі ў 2022-2023 гадах
На працягу 2022 году Эўразьвяз 6 разоў пашыраў санкцыі адносна Беларусі. Зь іх 5 раўндаў былі зьвязаныя з расейскім уварваньнем ва Ўкраіну і ўдзелам Беларусі ў гэтай агрэсіі.
- 18 лютага 2022 году пашыраныя фінансавыя санкцыі ў дачыненьні да «Банку разьвіцьця» і «Банку Дабрабыт».
- 27 лютага 2022 году ў сувязі з вайной Расеі з Украінай адноўлены санкцыйны сьпіс, у які ўключаныя фізычныя і юрыдычныя асобы з Расеі і Беларусі (670 пазыцый).
- 2 сакавіка 2022 году Эўразьвяз увёў адрасныя абмежавальныя меры ў дачыненьні да 22 высокапастаўленых беларускіх вайскоўцаў. Акрамя таго, уведзеныя абмежаваньні на гандаль беларускімі таварамі, якія выкарыстоўваюцца для вытворчасьці тытунёвых вырабаў, мінэральнага паліва, бітумных рэчываў і газападобных вуглевадародных прадуктаў, калійных прадуктаў, вырабаў з драўніны, цэмэнту, жалеза і сталі, гумовых вырабаў.
- 9 сакавіка 2022 году Эўразьвяз увёў новыя санкцыі адносна фінансавага сэктару Беларусі, у прыватнасьці, адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
- 8 красавіка 2022 году для беларускіх аўтаперавозчыкаў была ўведзеная забарона на перавозку грузаў аўтамабільным транспартам па тэрыторыі ЭЗ, у тым ліку транзытам.
- 2 чэрвеня 2022 году быў зацьверджаны пакет санкцый, які прадугледжваў адключэньне беларускага банку «Белінвэстбанк» ад міжнароднай плацёжнай сыстэмы SWIFT. Таксама ў пакет санкцый ЭЗ увайшлі абмежаваньні супраць 12 грамадзян Беларусі і 8 прадпрыемстваў, сярод якіх «Беларуськалій» і яго трэйдэр Беларуская калійная кампанія, НПЗ «Нафтан», Горадзенская тытунёвая фабрыка «Нёман», «Інтэр Табака», вытворца камунальнай аўтатэхнікі «Белкамунмаш», лягістычны апэратар «Белмытсэрвіс» і Белтэлерадыёкампанія.
На працягу 2023 году Эўразьвяз 2 разы пашыраў санкцыі адносна Беларусі.
- 3 жніўня 2023 году Эўразьвяз увёў новы пакет санкцыяў адносна Беларусі, у якія 38 фізычных асобаў і 3 прадпрыемствы: ААТ «Менскі электратэхнічны завод», ААТ «БМЗ — кіроўная кампанія холдынгу „БМК“» і Белнафтахім.
- 18 сьнежня 2023 году Эўразьвяз уключыў у санкцыйны сьпіс 12 беларускіх чыноўнікаў і вайскоўцаў.
- Шэраг краін ЭЗ на працягу 2022-2023 гадоў прымалі свае сувэрэнныя санкцыі адносна Беларусі — больш жорсткія, чым агульныя санкцыі Зьвязу.
Форум