Другі тур адбудзецца 7 ліпеня, і вынік галасаваньня застаецца вельмі нявызначаным, адзначае АР. Спаборнічаюць тры асноўныя палітычныя блёкі: ультраправае Нацыянальнае аб’яднаньне, цэнтрысцкі альянс прэзыдэнта Эманюэля Макрона і кааліцыя Новага народнага фронту, у якую ўваходзяць левацэнтрысты, зялёныя і радыкальныя левыя сілы.
Ва ўмовах разгромнай перамогі ўльтраправых на выбарах у Эўрапарлямэнт на пачатку чэрвеня Макрон прызначыў датэрміновае галасаваньне, бо баяўся, што інакш вынікі прывядуць да паралічу заканадаўчага органу.
Кіраўнік «Нацыянальнага аб’яднаньня» Жардан Бардэля заявіў, што калі б ён стаў прэм’ер-міністрам, ён быў бы супраць адпраўкі францускіх войскаў ва Ўкраіну — такой магчымасьці Макрон не выключаў. Бардэля таксама заявіў, што адмовіцца ад паставак Францыі ракет далёкага радыюсу дзеяньня і іншай зброі, здольнай паражаць цэлі ў самой Расеі.
У склад гэтага аб’яднаньня ўваходзіць Марын Лё Пэн, дачка вядомага радыкальна правага палітыка Жан-Мары Лё Пэна. Ультраправых Францыі даўно вінавацяць у сувязях з Крамлём і атрыманьні фінансаваньня ад Пуціна. Марын Лё Пэн даўно праводзіць прарасейскую рыторыку.
Выбары ўжо адбыліся на заморскіх тэрыторыях Францыі, у тым ліку Новай Каледоніі, што месьціца ў Акіяніі. Там зафіксаванае рэзкае павышэньне яўкі ў параўнаньні з парлямэнцкімі выбарамі, што адбыліся ў 2022-м. Калі тады прагаласавалі толькі 13%, то цяпер амаль 32,5%.
Пры гэтым становішча ў Новай Каледоніі застаецца нестабільным праз паўстаньне канакаў — карэнных жыхароў, якія патрабуюць вызваленьня свайго правадыра з турмы. Раней францускія ўлады на архіпэлягу арыштавалі сем дзеячоў незалежніцкага руху, у тым ліку лідэра Крыстыяна Тэйна.
Форум