Прыём заявак на Рэгіянальную журналісцкую стыпэндыю Радыё Свабодная Эўропа/Радыё Свабода (RFE/RL Regional Reporting Fellowship) на 2024–2025 акадэмічны год адкрыты.
Мэта стыпэндыі — забясьпечыць журналістаў-пачаткоўцаў з краінаў Заходніх Балкан і Усходняй Эўропы навыкамі і рэдакцыйным досьведам, неабходнымі для таго, каб стаць лідэрамі прафесійнай, незалежнай і этычнай прэсы.
Свабодныя і актыўныя мэдыя ёсьць гарантыяй супраць дэзынфармацыі, спрыяючы эфэктыўнаму кіраваньню і рэгіянальнай стабільнасьці. Рэгіянальная журналісцкая стыпэндыя кіруецца місіяй Радыё Свабода/Радыё Свабодная Эўропа — прадстаўляць дакладную незалежную журналістыку ў падтрымку дэмакратыі і правоў чалавека. Праграма фінансуецца за кошт гранту Дзярждэпартамэнта ЗША.
- Тэрмін стыпэндыі: 1 лістапада 2024-га — 30 чэрвеня 2025 г.
- Дэдлайн падачы заявак: 1 ліпеня 2024 г.
- Абвяшчэньне вынікаў адбору да 31 жніўня 2024 г.
Праграма стыпэндыі
Стыпэндыяты правядуць восем месяцаў у рэгіянальным бюро Радыё Свабодная Эўропа/Радыё Свабода (для беларускіх журналістаў — у Вільні), дзе яны пройдуць навучаньне, зробяць унёсак у штодзённую працу службы, у якую яны ўладкаваныя, і атрымаюць мэнтарства ад дасьведчаных калег. Падчас другой паловы праграмы стыпэндыяты правядуць два тыдні ў штаб-кватэры Радыё Свабодная Эўропа/Радыё Свабода ў Празе, каб прайсьці дадатковую падрыхтоўку.
Стыпэндыяты будуць атрымліваць штомесячную стыпэндыю на працягу тэрміну праграмы, якая адпавядае мясцовай шкале заработнай платы, працоўнае месца ў адпаведным бюро Радыё Свабодная Эўропа/Радыё Свабода.
Патрабаваньні да кандыдатаў:
- мець журналісцкую або сумежную адукацыю;
- мець ня менш за два гады досьведу працы ў журналістыцы;
- падзяляць місію Радыё Свабодная Эўропа/Радыё Свабода;
- валоданне ангельскай мовай не чакаецца, але пажадана практычнае яе веданьне.
Прымаюцца заяўкі ад журналістаў з Армэніі, Беларусі, Босніі і Герцагавіны, Грузіі, Косава, Малдовы, Паўночнай Македоніі, Сэрбіі і Ўкраіны.
- У выпадку Беларусі могуць падаваць заяўкі толькі журналісты, якія цяпер пражываюць за межамі краіны.
Як падаць заяўку
Поўная заяўка павінна ўключаць наступныя матэрыялы:
- рэзюмэ,
- матывацыйны ліст,
- 2 узоры працы.
Матэрыялы заяўкі павінны быць напісаныя на мове роднай краіны, але неабходна падаць копію рэзюмэ на ангельскай мове. Дакумэнты трэба накіроўваць праз партал онлайн-заяўкі.
З кандыдатамі, якія ўвайшлі ў кароткі сьпіс, зьвяжуцца і папросяць узяць удзел у тэлефонным, онлайн- або асабістым інтэрвію.
