«Я не дазволю выкарыстоўваць дэмакратыю для разбурэньня дзяржавы», – заявіў эмір. Ён таксама прыпыніў дзеяньне некалькіх артыкулаў Канстытуцыі. На час пераходнага пэрыяду эмір і кабінэт міністраў возьмуць на сябе заканадаўчыя паўнамоцтвы парлямэнта.
Эмір абвінаваціў нейкіх дэпутатаў у «выхадзе за рамкі» і «ўмяшаньні ў паўнамоцтвы эміра па яго выбары кронпрынца». Імёнаў ён не назваў. Кронпрынца – звычайна наступнага кіраўніка Кувэйта – павінен прызначыць дзеючы эмір. Па законе пасад пераходзіць да насьледнага прынца аўтаматычна пасьля сьмерці эміра, але спадчыньніка павінен зацьвердзіць парлямэнт.
Сам шэйх Мішааль, якому зараз 83 гады, стаў эмірам у сьнежні 2023 года пасьля сьмерці свайго 86-гадовага брата. Распушчаны зараз парлямэнт быў абраны ў красавіку і нават яшчэ не пачаў працу, адзначае The New York Times. Парлямэнт у Кувэйце значна больш уплывовы, чым у суседніх манархіях, у якіх ён мае хутчэй сымбалічнае значэньне. У ліку іншага дэпутаты могуць публічна дапытваць чальцоў урада і ўплываць на дзяржаўны бюджэт.
«Прыпыненьне працы парлямэнта пагражае ператварыць Кувэйт у такую ж аўтарытарную краіну, як і іншыя манархіі Пэрсыдзкай затокі», – лічыць прафэсар паліталёгіі з Унівэрсытэта Джорджыі Майкл Хэрб.
Форум