У выніку ізраільскіх удараў па горадзе Рафах на поўдні сэктару Газа за ноч загінулі 18 чалавек, у тым ліку 14 дзяцей, паведамілі ў нядзелю прадстаўнікі аховы здароўя сэктару, піша Reuters. Атака адбылася ў той час як Злучаныя Штаты былі на шляху да зацьвярджэньня мільярдаў даляраў дадатковай вайсковай дапамогі свайму блізкаму саюзьніку.
Ізраіль практычна штодня робіць паветраныя налёты на Рафах, дзе больш за палову 2,3-мільённага насельніцтва Газы схавалася ад баёў у іншых рэгіёнах паласы. Ізраіль таксама паабяцаў пашырыць свой наземны наступ на горад на мяжы з Эгіптам, нягледзячы на міжнародныя заклікі да стрыманасьці, у тым ліку з боку ЗША.
У суботу Палата прадстаўнікоў ЗША зацьвердзіла пакет дапамогі на 26 мільярдаў даляраў, які ўключае каля 9 мільярдаў даляраў гуманітарнай дапамогі Газе.
У выніку першага ўдару загінулі мужчына, яго жонка і іх 3-гадовае дзіця, паведаміла лякарня Кувайці, якая прыняла целы. Жанчына была цяжарная, і мэдыкам удалося выратаваць дзіця. Другі ўдар забіў 13 дзяцей і дзьвюх жанчын, усе з адной сям'і, паводле лекарскіх дакумэнтаў. У выніку авіяўдару па Рафаху напярэдадні вечарам загінулі дзевяць чалавек, у тым ліку шасьцёра дзяцей.
У вайне Ізраіля супраць тэрарыстычнай арганізацыі ХАМАС загінулі больш за 34 000 палестынскіх арабаў, згодна са словамі мясцовых чыноўнікаў аховы здароўя. Спустошаныя два найбуйнейшыя гарады Газы і пакінута паласа разбурэньняў па ўсёй тэрыторыі. Каля 80% насельніцтва пакінулі свае дамы і адправіліся ў іншыя часткі абложанага прыбярэжнага анкляву, які, на думку экспэртаў, знаходзіцца на мяжы голаду.
Канфлікт, які доўжыцца ўжо сёмы месяц, падагрэў рэгіянальны канфлікт, у выніку якога Ізраіль і ЗША сутыкнуліся з Іранам і праіранскімі баевікамі на Блізкім Усходзе. Раней у гэтым месяцы Ізраіль і Іран уступілі ў непасрэдную перастрэлку, што выклікала асьцярогі аб поўнай вайне паміж даўнімі ворагамі. Аднак у Тэгеране заявілі, што не жадаюць эскаляцыі і паведамілі, нібыта сур’ёзна пашкодзілі базу ў Ізраілі. Ізраільскі бок не камэнтаваў гэтай інфармацыі.
