Кіраўніца забароненага ўладамі Беларусі Саюзу палякаў Анжаліка Борыс сустракалася ў калёніі з асуджаным на 8 гадоў журналістам Анджэем Пачобутам. Спатканьне дазволіў Аляксандар Лукашэнка. Пра гэта Борыс расказала на сустрэчы з прэзыдэнтам Польшчы Анджэем Дудам, паведаміла канцылярыя польскага прэзыдэнта.
«Прэзыдэнт Дуда ўчора прыняў у прэзыдэнцкім палацы прадстаўнікоў Кіраўнічай рады Саюзу палякаў Беларусі Анжаліку Борыс і Марэка Занеўскага. Анжаліка Борыс паведаміла пра сваю сустрэчу з Анджэем Пачобутам, які знаходзіцца ў наваполацкай калёніі, што адбылася са згоды Аляксандра Лукашэнкі.
На сустрэчы ў прэзыдэнцкім палацы прыняў удзел дзяржсакратар канцылярыі Анджэй Дэра і старшыня Кіраўніцтва Фундацыі „Дапамога палякам на Ўсходзе“ Мікалай Фалькоўскі», — гаворыцца ў паведамленьні канцылярыі.
Калі дакладна Борыс пабывала ў калёніі і бачыла Пачобута, невядома.
Акрамя таго, Анжаліка Борыс сустрэлася з ваяводам падляскім Яцкам Бжазоўскім. Яны размаўлялі пра польскае школьніцтва ў Беларусі, дзейнасьць польскіх адукацыйных пляцовак і штодзённыя праблемы польскай супольнасьці за ўсходняй мяжой Польшчы, піша Радыё Рацыя.
Анджэя Пачобута арыштавалі ў сакавіку 2021 году, а 8 лютага 2023 году яму прысудзілі 8 гадоў пазбаўленьня волі. Праваабаронцы прызналі яго палітычным зьняволеным.
Палітзьняволенай была і сама Анжаліка Борыс. У сакавіку 2022 году Борыс перавялі са сьледчага ізалятару ў Жодзіне пад хатні арышт. 4 красавіка 2023 году стала вядома пра вызваленьне Борыс з-пад хатняга арышту. Пазьней справу супраць яе закрылі.
Хто такі Анджэй Пачобут
- Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі.
- Нарадзіўся 17 красавіка 1973 году ў Вялікай Бераставіцы (Горадзенская вобласьць). Яму 49 гадоў. Жыве ў Горадні. Жанаты, двое дзяцей: старэйшая дачка вучыцца ў Горадні ў мэдычным унівэрсытэце, малодшы сын ходзіць у школу.
- У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
- 25 сакавіка 2021 году Андрэя Пачобута затрымалі, прыйшоўшы да яго зь ператрусам.
- Трох фігурантак «польскай справы» Ірэну Бярнацкую, Марыю Цішкоўскую і Ганну Панішаву у траўні 2021 вызвалілі ўзамен на выезд зь Беларусі. Пачобут адмовіўся ад такой прапановы. Старшыню Анжаліку Борыс у сакавіку 2022 вызвалілі зь СІЗА пад хатні арышт.
- У Анджэя хворае сэрца. Раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.
- За артыкул пра напад СССР на Польшчу ў верасьні 1939-га Анджэя Пачобута абвінавацілі ў «распальваньні варожасьці па нацыянальнай прыкмеце». У публікацыі Пачобут назваў напад СССР на Польшчу 17 верасьня 1939 году агрэсіяй. Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
- У 2023-м Пачобуту вынесьлі прысуд — 8 гадоў калёніі. 21 чэрвеня стала вядома, што палітвязьня перавялі ў наваполацкую калёнію № 1.
