Паводле афіцыйнай інфармацыі МУС Расеі, двое супрацоўнікаў упраўленьня «Шчаўкоўскае» праводзілі апэратыўныя мерапрыемствы для затрыманьня гандляра наркотыкамі. Яны зрабілі засаду каля схованкі з буйной партыяй мэфэдрону недалёка ад гораду Чарнагалоўка. Калі па тавар прыйшоў невядомы, паліцыянты паспрабавалі яго затрымаць, але той адкрыў агонь зь пісталета.
Шэраг тэлеграм-каналаў паведамляюць, што злачынец уцёк на матацыкле, які пазьней быў знойдзены на трасе М-11, якая вядзе ў Санкт-Пецярбург.
Таксама тэлеграм-каналы распаўсюджваюць фота загінулага паліцыянта: мяркуючы па іх, ён быў у цывільным.
Сьледчы камітэт Расеі завёў крымінальную справу аб нападзе на паліцыянтаў. У Падмаскоўі аб’яўлены плян «Сырэна», які апошні раз уводзілі пасьля тэракту ў канцэртнай залі «Крокус Сіці Хол».
