Рэдакцыя партала «Люстэрка» атрымала копію інструкцыі і вывучыла, пра што папярэджваюць чыноўнікаў і што пагражае за адмову ад выкананьня.
Як сьцьвярджае крыніца «Люстэрка», інструкцыю пад назвай «Інфармацыя аб мерах адказнасьці за ўдзел у экстрэмісцкай дзейнасьці» ў бюджэтныя арганізацыі разаслаў Камітэт дзяржаўнай бясьпекі. Азнаёміцца зь ёй і расьпісацца пра гэта павінен быў кожны дзяржаўны службовец альбо супрацоўнік бюджэтнай арганізацыі, кажа суразмоўца. Паводле яго, за адмову ад гэтага нязгодных пагражаюць пакараць «ажно да звальненьня».
У дакумэнце сабраны цытаты з розных законаў і нарматыўных актаў, якія так ці інакш тычацца «экстрэмізму». У прыватнасьці, прыводзіцца падрабязнае вызначэньне паняцьця «экстрэмісцкая дзейнасьць» згодна з Законам «Аб супрацьдзеяньні экстрэмізму».
А таксама нагадваецца аб адказнасьці, прадугледжанай Крымінальным і Адміністрацыйным кодэксамі за стварэньне «экстрэмісцкага» фармаваньня або ўдзел у ім (арт. 361-1 КК), яго фінансаваньне (361-2 КК) і распаўсюджваньне «экстрэмісцкай» інфармацыі (арт. 19.11 КаАП).
Акрамя таго, дзяржаўных службоўцаў асобна папярэджваюць аб адказнасьці за заклікі да санкцый (арт. 361 КК) і дыскрэдытацыю Рэспублікі Беларусь (арт. 369-1 КК).
Згодна з дакумэнтам, дзяржаўныя службоўцы «не павінны публічна выказваць у сродках масавай інфармацыі сваё меркаваньне па пытаньнях дзяржаўнай палітыкі і службовай дзейнасьці». Але рабіць гэта ім забаронена толькі ў выпадку, калі іх асабістая думка не адпавядае «асноўным напрамкам палітыкі дзяржавы».
У сваіх акаўнтах у сацыяльных сетках чыноўнікі «не павінны дапускаць разьмяшчэньня інфармацыі, распаўсюджваньне якой у СМІ забаронена, а таксама зьвестак, якія могуць нанесьці шкоду іх пэрсанальнай рэпутацыі і аўтарытэту дзяржаўнай улады ў цэлым».
