Сутнасьць акцый Уладзіслава Бохана ў тым, што ён дасылае на электронныя адрасы школ ад імя розных дзяржаўных органаў патрабаваньне правесьці ў школе нейкую ідэалягічную акцыю, якую нібыта праводзяць па ўсёй краіне ці ў асобным рэгіёне, і даслаць у якасьці пацьверджаньня фота з праведзенай акцыі.
У лістах Бохан прасіў адміністрацыю школы правесьці вуснае інфармаваньне работнікаў пра «сустрэчу з Уладзіславам Боханам — даверанай асобай „нашага прэзыдэнта“ ад „Адзінай Расеі“», а таксама расклеіць улёткі з гэтай інфармацыяй.
Гэтым разам «даручэньне» пранкера выканалі настаўнікі дзьвюх зь сямі школ гораду Югра ў Кемераўскай вобласьці РФ, куды ён дасылаў лісты (школы № 14 і 15). У фае школы № 14 афішы з надпісам «За нашага прэзыдэнта!» трансьлявалі таксама на экране. Настаўнікаў не зьбянтэжыў нават QR-код на плякаце, які вядзе на канал Бохана.
«Плякат „даверанай асобы“ з такой трактоўкай „нашага прэзыдэнта“ з маім ганарлівым абліччам мог бы выклікаць падазрэньні — гэта раз. Я падпісаўся сваім імем — дастаткова ўвесьці запыт у Google, і стала б усё ясна — два. Проста на плякаце быў QR-код са спасылкай на мой канал. Але...» — напісаў Бохан пра акцыю.
Сутнасьць гэтай акцыі, як і мінулых, — «паказаць, якую ролю займаюць масы ў аўтакратычным грамадзтве», — пракамэнтаваў Уладзіслаў Бохан вынікі сваёй акцыі выданьню «Люстэрка».
«У большасьці ёсьць памылковае меркаваньне, што калі зьмяніць галаву, аўтакрата, то нешта зьменіцца. У сваім мастацкім акцыянізьме, які выліўся ў свайго роду сацыялягічнае дасьледаваньне, я разглядаю самыя нізы як субʼект аўтакратыі, які сам яе і спараджае», — тлумачыць задуму Ўладзіслаў.
Раней Бохан рассылаў беларускім і расейскім школам лісты з патрабаваньнем далучацца да розных флэшмобаў. Напрыклад, прапаноўваў настаўнікам арганізаваць конкурс пад перафразаваным дэвізам СС і правесьці акцыю «Праца вызваляе». Тэлеграм-канал Бохана ў Беларусі прызнаны «экстрэмісцкімі матэрыяламі».
На пытаньне «Люстэрка», чаму ён не праводзіў ніякіх акцый да нядаўніх выбараў у Беларусі, ён адказаў так:
«У Беларусі супраць мяне ўжо прынялі меры: у школы наўпрост пішуць або тэлефануюць з упраўленьня адукацыі. На іншыя арганізацыі навучальныя ўстановы ўжо не рэагуюць», — сказаў Уладзіслаў Бохан і дадаў, што былі выпадкі, калі ў адказ на лісты, якія ён адпраўляў у беларускія школы, яму прыходзілі паведамленьні: «Уладзіслаў Бохан, гэта вы?».
