Інфармацыя пра гэта зьявілася ў раскладзе судовых паседжаньняў на сайце Вярхоўнага суду, заўважыла выданьне Reform.by.
Згодна з раскладам судовых паседжаньняў, Уладзіслава Беладзеда абвінавачваюць паводле чатырох артыкулаў Крымінальнага кодэксу Беларусі:
- распальваньне варожасьці (ч. 1 арт. 130 КК),
- распаўсюд і выраб парнаграфіі (ч. 1 арт. 343 КК),
- абраза Лукашэнкі (ч. 1 арт. 368 КК),
- абраза прадстаўніка ўлады (арт. 369 КК).
Уладзіслава Беладзеда затрымалі ў траўні 2023 году. Спачатку яму тройчы прысуджалі па 15 сутак арышту па арт. 19.11 КаАП (распаўсюд экстрэмісцкіх матэрыялаў), а пасьля завялі на яго крымінальную справу. Тады СМІ пісалі, што яго абвінавачваюць у «распальваньні варожасьці» (артыкул 130 Крымінальнага кодэксу).
У «пакаяльным» відэа Беладзед казаў, што супрацоўнікі касьцёла падтрымлівалі пратэсты ў 2020 годзе, хавалі пратэстоўцаў, а ён асабіста сачыў зь вежы за перамяшчэньнем міліцыі і падаваў сыгнал пратэстоўцам, звонячы ў званы.
Уладзіслаў Беладзед — выпускнік Інстытуту тэалёгіі БДУ, пасьля яго заканчэньня паступіў у рымска-каталіцкую сэмінарыю і праходзіў практыку ў Архікатэдральным саборы, выкладаў там катэхезу.
Пасьля яго арышту курыя Менска-Магілёўскай архідыяцэзіі выступіла з заявай аб тым, што Ўладзіслаў быў адлічаны з сэмінарыі тры гады таму, у лютым 2020 году. Таксама курыя паведаміла, што ініцыявала кананічнае расьсьледаваньне ў сувязі са здарэньнем.
Уладзіслаў, як сьцьвярджаюць яго сваякі, мае сур’ёзныя праблемы са здароўем. Пасьля затрыманьня, паводле «Хрысьціянскай візіі», ён падвяргаўся катаваньням, жорсткаму абыходжаньню, бесчалавечным і прыніжаючым чалавечую годнасьць адносінам. На другім судзе сваякі Ўладзіслава Беладзеда пабачылі ў яго сьляды пабояў.
Праваабаронцы прызналі Ўладзіслава Беладзеда палітвязьнем.
