Яе абвінавачваюць паводле двух артыкулаў КаАП — 19.11 (распаўсюджваньне, выраб, захоўваньне, перавозка інфармацыйнай прадукцыі, якая зьмяшчае заклікі да экстрэмісцкай дзейнасьці або прапагандуе такую дзейнасьць) і 24.23 (парушэньне парадку арганізацыі або правядзеньня масавых мерапрыемстваў).
Пра гэта паведамляе інфармацыйнае агенцтва «Позірк».
Як адзначае Беларуская асацыяцыя журналістаў, позва ў суд была выпісаная Шабуні на 21 лютага, але разгляд справы адбыўся 16 лютага. Рашэньне невядомае.
Паводле слоў журналісткі, якая цяпер пражывае за межамі Беларусі, пратаколы былі складзеныя пасьля вывучэньня яе сацсетак: за падпіску на «экстрэмісцкі» рэсурс ёй інкрымінавалі арт. 19.11, за фатаздымак з выявай бел-чырвона-белага сьцяга і сьцягоў Украіны і Польшчы — ч. 1 арт. 24.23.
«Наяўнасьць гэтага здымка расцанілі як «несанкцыянаванае пікетаваньне», — сказала Шабуня.
Справу журналісткі разглядаў судзьдзя Міхаіл Юрчанка, які яе судзіў у кастрычніку 2020 году за «ўдзел у несанкцыянаваным мерапрыемстве». Тады за асьвятленьне акцыі пратэсту для тэлеканала «Белсат» Шабуню аштрафавалі на 5 базавых велічынь.
