У Беларусі назіраецца рост захворваньняў на вірусны гепатыт А, паведамілі 14 лютага ў прэс-службе Міністэрства аховы здароўя.
У ведамстве адзначаюць, што найбольшая колькасьць захворваньняў прыпадае на асеньне-зімовы пэрыяд, а большасьць хворых — дарослыя ва ўзросьце 18–39 гадоў, захворваньняў на гепатыт А сярод дзяцей — ня больш за 20% ад агульнай колькасьці выпадкаў.
З мэтай абмежаваньня распаўсюджваньня захворваньня ў Менску і рэгіёнах у лютым-сакавіку праводзяць вакцынацыю дарослых, якія блізка кантактавалі з хворым на гепатыт А, паведамілі ў Мінздароўя.
Гепатыт А, таксама вядомы як хвароба Боткіна — вострая вірусная інфэкцыя печані. Крыніца заражэньня — інфікаваны чалавек: хворы або такі, у каго інфэкцыя працякае бессымптомна. Інкубацыйны пэрыяд захворваньня — 14–50 дзён.
Заразіцца можна:
- кантактна-побытавым шляхам — праз брудныя рукі і прадметы побыту,
- пры ўжываньні інфікаваных прадуктаў харчаваньня і прыгатаваных зь іх страваў,
- пасьля ўжываньня вады негарантаванай якасьці (калёнкі, студні, крыніцы і інш.), асабліва ў пэрыяд адлігі ці паводкі.
Прыкметы захворваньня: пагаршэньне апэтыту, болі ў правым падрабрыньні, млоснасьць або ваніты, пацямненьне мачы, абясколерваньне калу, бялкі вачэй набываюць жоўтую афарбоўку. У шэрагу выпадкаў пачатак хваробы нагадвае грып — тэмпэратура падвышаецца да 38–39ºС, зьяўляецца катар, кашаль, ламота ва ўсім целе.
Мінздароўя нагадвае асноўныя меры прафіляктыкі гепатыту А:
- мыць рукі з мылам перад ядой, пасьля наведваньня прыбіральні і грамадзкіх месцаў;
- прамываць гародніну, садавіну і зеляніну пад праточнай вадой; замочваць сухафрукты і арэхі ў халоднай вадзе і потым прамываць;
- для піцьця ўжываць ваду толькі гарантаванай якасьці або кіпячонай;
- захоўваць тэмпэратурны рэжым і час гатаваньня ежы (вірус гепатыту А гіне толькі праз 5 хвілін кіпячэньня вады ці прадуктаў).
На пачатку лютага стала вядома, што за апошнія два тыдні ў Латвіі зарэгістравалі 9 выпадкаў гепатыту А, сярод іх 6 чалавек заразіліся ў Беларусі. Пры гэтым у сярэднім за апошнія пяць гадоў у Латвіі рэгістравалі 22 выпадкі на год (13–37 выпадкаў).
