Люблінскае аддзяленьне Дэпартамэнту арганізаванай злачыннасьці і карупцыі Нацыянальнай пракуратуры ў Любліне накіравала ў суд справу аб шпіёнскай сетцы, якая працавала на расейскія спэцслужбы. Абвінавачаных 16 чалавек, ім пагражае 10 гадоў пазбаўленьня волі, паведамляе прэс-служба пракуратуры Польшчы.
Сярод затрыманых чацьвёра беларусаў: Марыя Мядзьведзева, Мікалай Маскаленка, Уладзіслаў Пасьміцюха і Міхаіл А.
Пра першых трох затрыманых у сакавіку расказалі ў сюжэце беларускай тэлевізіі. У жніўні затрымалі 39-гадовага Міхаіла А, грамадзяніна Беларусі, нагадвае выданьне «Медиазона».
Паводле інфармацыі сьледзтва, абвінавачаныя дзейнічалі са студзеня па сакавік 2023 года. Выяўлялі крытычна важную інфраструктуру (у тым ліку вайсковыя аб’екты і марскія парты) у Белай Падляскай, Хэлме, Пярэмышлі, Жэшаве, Варшаве і іншых польскіх гарадах.
