Эўрапейская Рада ўхваліла два рашэньні, паводле якіх пачнецца лічбавізацыя працэдуры выдачы шэнгенскіх візаў.
Як адзначаецца на сайце арганізацыі, новыя правілы дазволяць людзям, якія плянуюць падарожжы ў Шэнгенскую зону, падаваць онлайн дакумэнты на атрыманьне візы.
«Магчымасьць падачы заявы на атрыманьне шэнгенскай візы праз інтэрнэт стане вялікім паляпшэньнем для грамадзян і для разгляду заявы. Гэта спросьціць працэс падачы заявак для падарожнікаў і ў той жа час зьменшыць нагрузку на нацыянальныя адміністрацыі», — паведаміў выканаўца абавязкаў міністра ўнутраных спраў Гішпаніі Фэрнанда Грандэ-Марляска Гомэс.
Паводле яго, неўзабаве будзе створана адпаведная плятформа, празь якую можна будзе падаваць заявы на візы. У адпаведную форму трэба будзе ўнесьці ўсе неабходныя зьвесткі, загрузіць электронныя копіі сваіх праязных дакумэнтаў, а таксама сплаціць візавы збор.
Пасьля ўвядзеньня новай працэдуры падаваць дакумэнты ў консульстве асабіста трэба будзе толькі ў выпадку першага атрыманьня шэнгенскай візы або тады, калі састарэлі біямэтрычныя зьвесткі або атрыманы новы праязны дакумэнт.
Плянуецца таксама, што замест традыцыйнай візавай налепкі ў пашпарт будзе ўклейвацца штрыхкод з крыптаграфічным подпісам.
Дата ўвядзеньня новых правілаў будзе вызначана пасьля завяршэньня тэхнічнай працы над візавай плятформай і лічбавай візай.
Цяпер для грамадзян Беларусі магчымасьць атрыманьня шэнгенскіх візаў абмежаваная. Найчасьцей беларусы зьвяртаюцца па атрыманьне нацыянальных візаў Літвы і Польшчы.
Пасьля таго як Аляксандар Лукашэнка падтрымаў расейскую агрэсію супраць Украіны, колькасьць супрацоўнікаў консульскіх устаноў замежных краін у Беларусі істотна скарацілася, а разам з гэтым і магчымасьць атрымаць нацыянальныя візы.
У Шэнгенскую зону ўваходзяць 27 краінаў.
