Паралімпіец Аляксей Талай узнагароджаны расейскім ордэнам Дружбы, адпаведны ўказ 8 лістапада падпісаў прэзыдэнт РФ Уладзімір Пуцін, піша «Позірк» са спасылкай на тэлеграм-канал спартоўца.
Узнагарода яму будзе ўручаная «за заслугі ва ўмацаваньні дружбы і супрацоўніцтва паміж народамі, плённую дзейнасьць па збліжэньні і ўзаемаўзбагачэньні культур нацый і народнасьцяў», адзначаецца ва ўказе.
«Няма слоў, каб выказаць нашыя эмоцыі! Вялікая радасьць і гонар... Будзем і далей плённа працаваць на ўмацаваньне адзінай, саюзнай Айчыны ад Берасьця да Ўладзівастоку — Беларусі і Расеі!» — напісаў Талай.
«Народнае антыкрызіснае ўпраўленьне» (НАУ) абвінавачвае паралімпійца ў незаконным перамяшчэньні ўкраінскіх дзяцей з акупаваных тэрыторый.
У чэрвені НАУ перадало ў Міжнародны крымінальны суд (МКС) дакумэнты з «доказамі ваенных злачынстваў» рэжыму ў Менску, у тым ліку па перамяшчэньні дзяцей. У іх, акрамя Талая, фігуруюць Аляксандар Лукашэнка, дзяржсакратар «саюзнай дзяржавы Беларусі і Расеі» Дзьмітрый Мезенцаў, кіраўнік «Беларуськалію» і чалец Савету Рэспублікі Іван Галаваты, а таксама дырэктарка Данецкай грамадзкай арганізацыі дзяцей-інвалідаў і іх бацькоў «Дэльфіны» Вольга Волкава.
Згодна з матэрыяламі НАУ, гэтыя асобы «ўчынілі ваенныя злачынствы», якія выразіліся ў «незаконным перамяшчэньні ўкраінскіх дзяцей з акупаваных Расеяй тэрыторый у Беларусь і іх пераадукацыі».
4 кастрычніка кіраўнік НАУ Павал Латушка заявіў, што «толькі зь верасьня 2022 году па травень 2023 году ў лягер „Дубрава“ было дастаўлена прынамсі 2100 украінскіх дзяцей ва ўзросьце ад 6 да 15 гадоў з 15 гарадоў Украіны».
У сакавіку 2023 году Міжнародны крымінальны суд выдаў ордэр на арышт Пуціна і расейскага дзіцячага омбудсмэна Марыі Львовай-Бяловай у сувязі зь незаконным перамяшчэньнем дзяцей з акупаваных РФ тэрыторый Украіны. Беларускія дэмакратычныя сілы дамагаюцца, каб суд на тых жа падставах выдаў аналягічны ордэр на згаданых прадстаўнікоў Беларусі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
