ХАМАС 23 кастрычніка вызваліў дзьвюх пажылых ізраільскіх жанчын, узятых у закладніцы ў сэктары Газа, паколькі Злучаныя Штаты выказвалі ўсё большую занепакоенасьць тым, што эскаляцыя вайны паміж Ізраілем і ХАМАС выкліча больш шырокі канфлікт у рэгіёне, уключаючы напады на амэрыканскія войскі.
Колькасьць загінулых у сэктары Газа імкліва ўзрасла, калі Ізраіль нарасьціў інтэнсіўнасьць авіяўдараў. Злучаныя Штаты параілі Ізраілю адкласьці наземную апэрацыю, каб даць час для перамоваў аб вызваленьні дадатковых закладнікаў, узятых ХАМАС падчас яго жорсткага ўварваньня на тэрыторыю Ізраілю паўмесяца таму.
Трэці невялікі канвой дапамогі з Эгіпту ўвайшоў у Газу, дзе ў насельніцтва 2,3 мільёна чалавек не хапае ежы, вады і лекаў пад закрытай мяжой Ізраіля. Паколькі Ізраіль па-ранейшаму забараняе ўвоз паліва, Арганізацыя Аб’яднаных Нацый заявіла, што разьмеркаваньне дапамогі спыніцца празь некалькі дзён, калі больш ня будзе магчымасьці запраўляць грузавікі ў Газе.
Шпіталі, наводненыя пастаянным патокам параненых, змагаюцца за тое, каб падтрымліваць працу генэратараў, якія забясьпечваюць выратавальнае мэдыцынскае абсталяваньне і інкубатары для неданошаных дзяцей.
Дзьвюх вызваленых закладніц, 85-гадовую Ёхэвэд Ліўшыц і 79-гадовую Нурыт Купэр, вывезьлі з Газы на пераходзе Рафах у Эгіпет, дзе іх пасадзілі ў машыны хуткай дапамогі, вынікае з кадраў, паказаных эгіпецкай тэлевізіяй. Дзьве жанчыны разам са сваімі мужамі былі выкрадзеныя з дамоў у кібуцы Нір-Оз каля мяжы з Газай 7 кастрычніка. Іхных мужоў, якім 83 і 84 гады адпаведна, не адпусьцілі.
Дачка Ліўшыца Шарон, мастачка і навуковец, якая жыве ў Лёндане, раней сказала журналістам, што яе бацькі былі мірнымі актывістамі, а яе бацька езьдзіў на мяжу з Газай, каб даставіць палестынцаў ва ўсходні Ерусалім для лячэньня.
ХАМАС і іншыя баевікі захапілі каля 220 чалавек, у тым ліку непацьверджаную колькасьць іншаземцаў і асобаў з двайным грамадзянствам.
23 кастрычніка ХАМАС апублікаваў відэазапіс, на якім баевікі даюць напоі і ежу жанчынам і трымаюць іх за рукі, калі вядуць да супрацоўнікаў Чырвонага Крыжа.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
