У Менскім гарадзкім судзе 29 верасьня пачнуць судзіць 57-гадовую грамадзянку Латвіі Алу Сакаленку, паведамляе «Вясна». Яе абвінавачваюць у агентурнай дзейнасьці паводле арт. 358-1 Крымінальнага кодэксу. Гэты артыкул прадугледжвае пазбаўленьне волі ад 3 да 7 гадоў. Справу ў закрытым рэжыме будзе разглядаць Анастасія Папко.
У прапагандысцкім фільме паведамлялася, што «Сакаленка па заданьні латвійскіх спэцслужбаў рыхтавала да вэрбаваньня беларускіх вайскоўцаў, зьбірала зьвесткі, стварала кампрамэнтуючыя сытуацыі, якія потым і служаць падставай для вэрбаваньня іншаземцамі».
Грамадзянку Латвіі ўтрымліваюць пад вартай у беларускім СІЗА. Прэс-сакратар МЗС зазначыў, што амбасада Латвіі ў Віцебску аказвае ёй консульскую дапамогу ў межах магчымасьцяў.
