Пуцін расказаў карэспандэнту «Коммерсанта» Андрэю Калесьнікаву пра сваю сустрэчу з камандзірамі і кіраўніком ПВК «Вагнэр» Яўгеніем Прыгожыным, якая прайшла празь некалькі дзён пасьля няўдалага мяцяжу.
Паводле Пуціна, на сустрэчы ён даў ацэнку іх дзеяньням на полі бою і «падчас падзеяў 24 чэрвеня» (калі адбыўся мяцеж Прыгожына. — РС), а таксама «паказаў магчымыя варыянты» іх далейшай службы.
На пытаньне «Коммерсанта», ці захаваецца ПВК «Вагнэр» як баявая адзінка, Пуцін адказаў, што ПВК «Вагнэр» не існуе. «У нас жа няма закону аб прыватных вайсковых арганізацыях. Проста не існуе», — сказаў Пуцін.
Крыху больш за два тыдні таму прэзыдэнт РФ заявіў, што дзяржава «цалкам фінансавала» гэтую кампанію. Па словах Пуціна, за год дзяржава заплаціла ёй больш за 86 мільярдаў рублёў (больш за мільярд даляраў у эквіваленце).
«Група ёсьць, але юрыдычна не існуе!» — сказаў Пуцін «Коммерсанту», назваўшы гэта «асобным пытаньнем, зьвязаным з рэальнай легалізацыяй».
Пуцін паведаміў, што на сустрэчы зь ім было 35 чалавек. Ім прапаноўваліся некалькі варыянтаў «працаўладкаваньня», у тым ліку пад кіраўніцтвам «іх непасрэднага камандзіра з пазыўным „Седой“».
«Усе яны маглі сабрацца ў адным месцы і працягваць служыць. І для іх нічога б не зьмянілася. Імі кіраваў бы той жа чалавек, які быў іх рэальным камандзірам увесь гэты час», — патлумачыў Пуцін.
«Многія ківалі, калі я гэта казаў. А Прыгожын, які сядзеў наперадзе і ня бачыў гэтага, сказаў, выслухаўшы: «Не, хлопцы ня згодныя з такім рашэньнем», — апісаў прэзыдэнт Расеі рэакцыю «вагнэраўцаў» на яго словы.
- 14 ліпеня 2023 году Міністэрства абароны Беларусі паведаміла, што пад Асіповічамі пачаліся заняткі тэрытарыяльных войскаў з удзелам інструктараў ПВК «Вагнэр».
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
