Для закрыцьця мяжы зь Беларусьсю няма ніякіх падстаў, заявіў міністар замежных спраў Літвы Габрыелюс Ландсбергіс. Яго словы прыводзіць 30 чэрвеня партал навінаў Delfi.
Ландсбергіс падкрэсьліў, што закрыцьцё мяжы магчыма толькі ў выпадку «ўзьнікненьня крызісу, які нясе прамую пагрозу нацыянальнай бясьпецы», таму што такія дзеяньні «маюць далёкія наступствы»:
«Мяжа, якая зьвязвае нас непасрэдна зь Беларусьсю, таксама зьвязвае Літву з усім сьветам на ўсход. Скажам, такімі краінамі, як Казахстан, Узбэкістан і многія іншыя — Грузія, Армэнія. Мы павінны ўлічваць і гэта», — сказаў кіраўнік літоўскага МЗС.
На яго думку, закрыцьцё мяжы — гэта «чырвоная кнопка».
На перакананьне Ландсбергіса, у байцоў расейскай прыватнай ваеннай кампаніі «Вагнэр» няма магчымасьці патрапіць на тэрыторыю Літвы, акрамя як перасячы яе нелегальна, у прыватнасьці, «па падробленых дакумэнтах»:
«У нас ёсьць рашэньне, прынятае, напэўна, год таму, згодна зь якім грамадзянам Расеі, якія прыбываюць з турыстычнымі або негуманітарнымі мэтамі, уезд у Літву забаронены», — зазначыў міністар.
29 чэрвеня міністар унутраных спраў Літвы Агне Білатайце даручыла Службе аховы дзяржаўнай мяжы дадаткова ўзмацніць праверку асоб, якія прыбываюць зь Беларусі і Калінінградскай вобласьці.
Прэс-служба літоўскага МУС анансавала больш дбайныя праверкі дакумэнтаў і віз у асоб, якія падарожнічаюць па тэрыторыі Літвы транзытам.
Білатайце падкрэсьліла, што калі ўзровень пагрозы ў рэгіёне зьменіцца, дзяржаўная мяжа Літвы «будзе гатова да закрыцьця».
26 чэрвеня Дзяржаўная рада абароны Літвы заявіла аб неабходнасьці ўзмацніць бясьпеку ўсходніх межаў краіны і НАТА. Прэзідэнт Гітанас Наўседа не выключыў замацаваньня «вагнэраўцаў» на тэрыторыі Беларусі. Удзельнікі пасяджэньня ўказалі на рост «пагрозы незаконнай дзейнасьці на літоўска-беларускай мяжы, а таксама розных правакацый».
Дзяржсавет абароны даручыў разьведвальным структурам «надаваць яшчэ больш увагі збору інфармацыі» ў Беларусі і Калінінградскай вобласьці Расеі.
Наўседа заклікаў вярнуцца «да ўжо ўнесенай прапановы аб прымяненьні працэдуры індывідуалізаванай дадатковай праверкі» адносна грамадзян не толькі РФ, але і Беларусі.
Больш пільная праверка на мяжы зь Беларусьсю
Раней паведамлялася, што з 1 студзеня 2023 года ў Літву не ўпусьцілі 1200 грамадзян Беларусі і 1300 грамадзян Расеі. Правяраць больш пільна будуць грамадзян Беларусі і Расеі, у тым ліку тых, якія едуць праз тэрыторыю Літвы транзытам.
Літоўскія ўлады ўвялі больш жорсткія праверкі на фоне напружанасьці, якая ідзе ад Масквы і Менску ў сувязі з вайной ва Ўкраіне. Паводле кіраўніцы МУС Літвы Агне Білатайце, калі ўзровень пагрозы ў Літве зьменіцца, мяжу могуць закрыць.
23 чэрвеня заснавальнік ПВК «Вагнер» Яўген Прыгожын фактычна ініцыяваў працэс ваеннага перавароту ў Расеі. У выніку дамоўленасьцяў, у тым ліку з Аляксандрам Лукашэнкам, на наступны дзень ён спыніў свой марш на Маскву. Прэзыдэнт РФ Уладзімір Пуцін дазволіў Прыгожыну зьехаць у Беларусь. 27 чэрвеня Аляксандр Лукашэнка пацьвердзіў прыбыцьцё кіраўніка «Вагнэра».
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
