Расея атакавала баявымі дронамі поўнач і захад Украіны, а з артылерыі вяла агонь па Запарожжы і Запароскай вобласьці. Ва ўсіх гэтых рэгіёнах ад абстрэлаў пацярпелі прамысловыя аб’екты.
Кіеў атакавалі дронамі ўпершыню за апошнія 18 дзён
Гарадзкія ўлады паведамілі, што пашкоджаны вонкавыя камунікацыі мэтро, але яны будуць адрамантаваныя найбліжэйшым часам.
«Дроны заходзілі на сталіцу хвалямі, курсамі з розных кірункаў», — паведамілі ў Кіеўскай гарадзкой вайсковай адміністрацыі.
Інфармацыі аб пацярпелых і маштабных руйнаваньнях пакуль няма. На падлёце да Кіева паветраныя сілы зьнішчылі каля 20 дронаў.
Ужо праз гадзіну пасьля атакі ў трох раёнах сталіцы зьнікла сьвятло, але ўлады сьцьвярджаюць, што гэта адбылося праз аварыю на чатырох высакавольтных падстанцыях. Электразабесьпячэньне аднавілі на пачатку 9-й раніцы.
У Львове тры дроны пацэлілі ў крытычны інфраструктурны аб’ект
Кіраўнік Львоўскай абласной вайсковай адміністрацыі Максім Казіцкі паведаміў, што Расея атакавала рэгіён іранскімі дронамі.
«Пацэлілі ў крытычна важны аб’ект. Тры пацэльваньні. Пашкоджана перакрыцьцё паміж паверхамі, выбітыя шыбы. Ахвяраў ці пацярпелых няма. Быў пажар», — паведаміў кіраўнік вобласьці.
Мэр Львова Андрэй Садавы ўдакладніў, што праз пашкоджаньні прамысловага аб’екта транспартнікі горада вымушаныя былі зьмяніць рух электрычнага гарадзкога транспарту. Ніякіх іншых дэталяў улады не паведамляюць.
Запарожжа пацярпела і ад дронаў, і ад ракет
У Запарожжы і ваколіцах ад расейскай атакі пацярпелі камунікацыі, сельскагаспадарчае і фэрмэрскае прадпрыемства. Інфармацыі аб пацярпелых пакуль няма. Адмыслоўцы спрабуюць зьліквідаваць наступствы абстрэлаў.
У вобласьці ў выніку абстрэлаў пацярпелі 19 населеных пунктаў. Расейцы абстрэльвалі рэгіён з артылерыі і авіяцыі.
«Пакуль што зафіксавалі 50 паведамленьняў аб разбурэньнях: кватэры, дамы, аўтамабілі, адміністрацыйныя і гаспадарчыя будынкі. У Арэхаве мінна-выбуховыя траўмы атрымаў 54-гадовы мужчына. Яго апэратыўна даставілі ў лякарню», — паведаміла абласная адміністрацыя.
Расея атакавала Ўкраіны з Бранскай вобласьці і Азоўскага мора
У камандаваньні Паветраных сіл Украіны паведамілі, што галоўнымі цэлямі цяперашняй атакі Расеі былі вайсковыя і інфраструктурныя аб’екты.
«Пускі ажыцьцяўляліся з паўночнага і паўднёвага кірункаў — Бранскай вобласьці і ўсходняга ўзьбярэжжа Азоўскага мора», — паведамілі ў Паветраных сілах Украіны.
З 35 дронаў сродкі супрацьпаветранай абароны Ўкраіны зьнішчылі 32. У паведамленьні адзначаецца, што большасьць дронаў накіроўваліся на Кіеўшчыну, а па Запарожжы Расея наносіла ўдары балістычнымі ракетамі С-300.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
