Пра гэта заявіў прадстаўнік Галоўнай управы выведкі Міністэрства абароны Ўкраіны Андрэй Юсаў у інтэрвію на ютуб-канале «Дзьмітры Гардон».
«Народ Беларусі чарговы раз аказваецца ў закладніках, цяпер ужо з дадатковым аргумэнтам ядзернага шантажу», — зазначыў Юсаў.
Прадстаўнік ГУР падкрэсьліў, што для Ўкраіны важным фактарам застаецца тое, што, нягледзячы на ўсе «танцы з бубнамі, а цяпер ужо зь ядзерным бубнам, Беларусь ня ўцягнутая ў поўнамаштабную наземную апэрацыю вайны Расеі супраць Украіны, і прыкмет гэтага не назіраецца. А ўсё астатняе... Хочуць пакрычаць, памахаць кулакамі, пагразіць камусьці, грозна паварушыць вусамі — калі ласка», — дадаў Юсаў.
Ён падкрэсьліў, што «нечым дадатковым для Эўропы, NATO, Украіны гэта (разьмяшчэньне ядзернай зброі ў Беларусі. — BPN) не пагражае».
Блізкі да ўкраінскіх сілавікоў тэлеграм-канал «Вэртыкаль» (207 тыс. падпісчыкаў) сьцьвярджае, што месцы разьмяшчэньня ядзернай зброі ў Беларусі вядомыя Галоўнай управе выведкі Мінабароны Ўкраіны, «таксама вядомыя прозьвішчы ўсіх адказных за бясьпеку аб’ектаў».
16 чэрвеня Ўладзімір Пуцін на Пецярбурскім міжнародным эканамічным форуме заявіў, што першыя ядзерныя зарады ўжо дастаўленыя на тэрыторыю Беларусі. Ён таксама патлумачыў, што выкарыстаньне ядзернай зброі «тэарэтычна магчымае», калі будзе створаная пагроза тэрытарыяльнай цэласнасьці, незалежнасьці, сувэрэнітэту Расеі.
Іншыя падставы для ўжываньня расейскай ядзернай зброі, у тым ліку і пагрозы яе саюзьнікам, прэзыдэнт РФ у сваім выступе не прыгадаў,
13 чэрвеня ў інтэрвію расейскай прапагандыстцы Вользе Скабеевай Аляксандар Лукашэнка заявіў, што ўжыве тактычную ядзерную зброю ў выпадку агрэсіі супраць Беларусі. «Ня дай Бог мне давядзецца прымаць рашэньне на прымяненьне гэтай зброі ў цяперашні час. Але ніякага ваганьня ня будзе, калі толькі супраць нас будзе агрэсія», — сказаў Лукашэнка.
Разам з тым у тым жа інтэрвію Лукашэнка прызнаў, што ўжываньне ядзернай зброі, разьмешчанай у Беларусі, будзе ўзгадняць з Пуціным. «Вось часта чую: „А, вось гэтую расейскую зброю без Расеі ён не прыменіць“. Слухайце, калі пачнецца вайна, я што, буду глядзець па баках?! Ды не. Зьняў трубку — дзе б ён (Пуцін. — РС) ні быў, ён патэлефанаваў — я зьняў трубку, у любы момант. Нават вось зараз. Таму ну ў чым праблема ўзгадненьня нейкага там удару? Гэта не пытаньне!» — сказаў Лукашэнка.
Пляны разьмяшчэньня ядзернай зброі ў Беларусі. Асноўнае
25 сакавіка прэзыдэнт Расеі Ўладзімір Пуцін у этэры тэлеканалу «Россия-24» заявіў, што 1 ліпеня ў Беларусі скончыцца будаўніцтва сховішча для тактычнай ядзернай зброі. Паводле яго, Аляксандар Лукашэнка ўжо доўгі час прасіў яго разьмясьціць тактычную ядзерную зброю ў Беларусі. Акрамя таго, Масква ўжо перадала Менску ракетны комплекс «Іскандэр», які можа выкарыстоўваць гэтую зброю, і што дзесяць беларускіх самалётаў нібыта ўжо пераабсталявалі для нясеньня такой зброі.
Сакратар Рады нацыянальнай бясьпекі і абароны Ўкраіны Аляксей Данілаў заявіў, што разьмяшчэньне ядзернай зброі зьяўляецца крокам да «да ўнутранай дэстабілізацыі краіны і максымальна падвышае ўзровень нэгатыўнага ўспрыманьня і агульнага адпрэчаньня ў беларускага грамадзтва Расеі і Пуціна».
Міністэрства замежных спраў Украіны запатрабавала тэрмінова склікаць паседжаньне Рады Бясьпекі ААН у сувязі з заявай Пуціна аб разьмяшчэньні расейскай ядзернай зброі ў Беларусі.
У Пэнтагоне пасьля заявы Пуціна адзначылі, што пакуль ня бачылі ніякіх прыкметаў перамяшчэньня ядзернай зброі на тэрыторыю Рэспублікі Беларусь.
Некаторыя вайсковыя экспэрты таксама адзначылі, што да разьмяшчэньня такой зброі ў Беларусі насамрэч нічога не гатова. Іншыя дасьледчыкі гавораць аб тым, што ядзерная зброя ўсё ж зьявіцца, і гэта пацягне за сабой заснаваньне сталых вайсковых базаў Расеі на беларускай тэрыторыі.
У Міністэрстве замежных спраў Беларусі 28 сакавіка заявілі, што рашэньне аб разьмяшчэньні на тэрыторыі краіны ядзернай зброі ўхвалена ў адказ на «беспрэцэдэнтны палітычны, эканамічны і інфармацыйны ціск з боку ЗША, Вялікай Брытаніі і іх хаўрусьнікаў па NATO, а таксама дзяржаў Эўрапейскага зьвязу».
Прапагандысты ў дзяржаўных СМІ пазытыўна ацанілі намеры Расеі перакінуць тактычную ядзерную зброю на тэрыторыю Беларусі і пачалі пагражаць ударамі заходнім дзяржавам.
Эўразьвяз і Польшча заявілі аб тым, што зьбіраюцца ўвесьці больш жорсткія санкцыі супраць Менску ў выпадку разьмяшчэньня тактычнай ядзернай зброі.
Кітай заклікаў не дапусьціць далейшай канфрантацыі ядзерных дзяржаў. Між іншым, у сумеснай заяве, прынятай па выніках нядаўняй сустрэчы старшыні КНР Сі Цзіньпіна і прэзыдэнта Расеі Ўладзіміра Пуціна, ёсьць пункт:
«Усе ядзерныя дзяржавы не павінны разьмяшчаць ядзерную зброю за межамі нацыянальных тэрыторый і павінны вывесьці ўсю разьмешчаную за мяжой ядзерную зброю».
Прадстаўнік Аб’яднанага пераходнага кабінэту ў абароне і нацыянальнай бясьпецы Валер Сахашчык у інтэрвію Свабодзе дапусьціў, што намеры расейцаў могуць актывізаваць партызанскі рух у Беларусі.
Пляны Расеі разьмясьціць тактычную ядзерную зброю ў Беларусі ёсьць «небясьпечнай і безадказнай рыторыкай» Масквы, заявіў генэральны сакратар Паўночнаатлянтычнага альянсу Енс Столтэнбэрг літоўскім журналістам на дыстанцыйнай прэс-канфэрэнцыі 27 красавіка. Пляны Расеі асудзілі краіны Захаду, прадстаўнікі беларускіх дэмакратычных сілаў, насьцярожана выказаўся Кітай.
16 траўня пастаянны прадстаўнік Беларусі ў ААН Валянцін Рыбакоў падчас дэбатаў аб месцах непастаянных чальцоў Рады Бясьпекі ААН на 2024–2025 гады, камэнтуючы пытаньне аб разьмяшчэньні на тэрыторыі Беларусі расейскай тактычнай ядзернай зброі, сказаў, што заява Расеі — «перш за ўсё гэта проста заява» і «нічога ў практычным сэнсе не было зроблена ў гэтых адносінах».
Кіраўнік Міністэрства абароны Беларусі Віктар Хрэнін сустрэўся з расейскім калегам Сяргеем Шайгу, які прыляцеў 25 траўня 2023 году ў Менск. Міністры падпісалі дакумэнты, якія вызначаюць парадак утрыманьня расейскай нестратэгічнай ядзернай зброі ў адмысловым сховішчы на тэрыторыі Беларусі, паведамілі дзяржаўныя СМІ. Шайгу падкрэсьліў, што «кантроль над зброяй і рашэньне аб ужываньні застаецца за Масквой».
9 чэрвеня ў Сочы кіраўнік Расеі Пуцін заявіў, што 7–8 ліпеня на тэрыторыі Беларусі скончыцца падрыхтоўка «адпаведных збудаваньняў», пасьля чаго з Расеі адразу завязуць тактычную ядзерную зброю.
13 чэрвеня Лукашэнка заявіў, што ядзерная зброя ў Беларусі ў тры разы магутнейшая за прымененую амэрыканцамі ў 1945-м у Хірасіме і Нагасакі. 16 чэрвеня Пуцін на эканамічным форуме ў Санкт-Пецярбургу адзначыў, што першыя ядзерныя зарады ўжо даставілі ў Беларусь.
19 чэрвеня прэзыдэнт ЗША Джо Байдэн назваў «рэальнай» пагрозай тое, што Пуцін аддасьць загад аб выкарыстаньні тактычнай ядзернай зброі падчас вайны супраць Украіны.
Кіраўнік выведкі Ўкраіны Кірыл Буданаў 20 чэрвеня заявіў, што, згодна са зьвесткамі выведкі, Расея пакуль не перадала Беларусі ніводнай ядзернай боегалоўкі. Аднак ён адзначыў, што падрыхтоўка сховішчаў пад ТЯЗ сапраўды вядзецца.
