Хроніка перасьледу 15 чэрвеня: судзяць палітвязьня за самвыдат «Весьнікі»; SYMPA прызналі «экстрэмісцкім фармаваньнем»

У Менскім гарадзкім судзе распачаўся суд над палітзьняволеным Андрэем Фаміным, паведамляе «Вясна».

Яго абвінавачваюць паводле трох артыкулаў Крымінальнага кодэксу: ч. 3 арт. 361 («Заклікі да санкцый»), ч. 1 арт. 342 («Удзел у дзеяньнях, якія груба парушаюць грамадзкі парадак»), ч. 3 арт. 361-1 («Стварэньне экстрэмісцкага фармаваньня»).

Паводле блізкіх, Андрэя білі — гэта відаць і на відэа, якое апублікавалі на наступны дзень пасьля затрыманьня праўладныя тэлеграм-каналы.

Пасьля затрыманьня Андрэя паведамлялася, што ён нібыта быў рэдактарам і аўтарам артыкулаў для сеткі самвыду «Весьнікі», якую праз паўтара месяца пасьля яго затрыманьня прызналі «экстрэмісцкім фармаваньнем».

Таксама Андрэя абвінавачваюць ва ўдзеле ў маршы 30 жніўня 2020 году.

Справу разглядае судзьдзя Анжэла Касьцюкевіч.

ГЛЯДЗІЦЕ ТАКСАМА:

Хроніка перасьледу 13 чэрвеня: затрымалі ўладальніцу аграсядзібы «Стулы», актывіста незалежнага прафсаюзу ў Горадні адправілі ў калёнію

SYMPA прызналі «экстрэмісцкім фармаваньнем»

Школу маладых мэнэджэраў публічнага адміністраваньня SYMPA прызналі «экстрэмісцкім фармаваньнем». Адпаведнае рашэньне прыняў КДБ 12 чэрвеня, заўважыў Reform.by. Яно набывае сілу зь сёньняшняга дня.

У сакавіку незалежную экспэртку, сузаснавальніцу Sympa Тацяну Кузіну асудзілі на 10 гадоў пазбаўленьня волі паводле артыкулаў аб «распальваньні варожасьці» і «змове з мэтай захопу ўлады».

ГЛЯДЗІЦЕ ТАКСАМА:

Вынесьлі выракі Касьцюговай і Кузінай: па 10 гадоў калёніі агульнага рэжыму