Былая галоўная рэдактарка палітыка-эканамічнага блёку ў Tut.by Вольга Лойка запусьціла ўласнае СМІ, паведамляе Press Club Belarus.
Мэдыя пад назвай «Плян Б» будзе пісаць пра палітыку, эканоміку і сэнс жыцьця беларусаў па абодва бакі мяжы. Аўтары абяцаюць даваць аналіз таго, што адбываецца, «у даступнай форме», «складаныя рэчы тлумачыць чалавечай мовай» і «экспэртна паказваць прычынна-выніковыя сувязі».
«У нас ёсьць аўтарскі погляд і наяўнасьць крыніц з двух бакоў барыкадаў — адэкватных людзей, якія займаюцца аналітыкай, а не актывізмам. Плюс бясцэнны жыцьцёвы вопыт.
Мы запускаем новае мэдыя, таму што нам ёсьць што сказаць. Таму што можна чалавека пасадзіць, адабраць Радзіму, прафэсію, працу, калег і сяброў, але забараніць яму думаць і адчуваць немагчыма. І пісаць пра гэта, наколькі можна», — расказала Вольга Лойка пра ўласнае СМІ.
- Вольгу Лойку затрымалі ў траўні 2021 году ў межах крымінальнай справы, заведзенай супраць TUT.BY за ўхіленьне ад выплаты падаткаў у асабліва буйным памеры (ч. 2 арт. 243 Крымінальнага кодэксу).
- 17 сакавіка 2022 году яна выйшла зь СІЗА-1. Ёй зьмянілі меру стрыманьня, але абвінавачаньняў не зьнялі.
- Вольга Лойка здолела выехаць зь Беларусі. Яе абвясьцілі ў вышук, а летась КДБ унёс яе ў «сьпіс тэрарыстаў».
- У красавіку 2023 году прайшоў суд па «справе Tut.by» — галоўнай рэдактарцы выданьня Марыне Золатавай і генэральнай дырэктарцы Людміле Чэкінай прысудзілі па 12 гадоў зьняволеньня. Вядзеньне па крымінальнай справе ў дачыненьні да Вольгі Лойкі, а таксама журналісткі Алены Талкачовай і юрысконсульта Кацярыны Ткачэнкі прыпынілі да іх вышуку.
