У прыблізна 359 тысячаў маламаёмасных жыхароў Беларусі наяўныя рэсурсы былі ніжэйшыя за бюджэт пражытковага мінімуму. Цяпер гэты бюджэт у сярэднім на душу насельніцтва складае 352,13 рубля ў месяц, нагадвае Zerkalo.
Больш за ўсё за рысай беднасьці (у працэнтных суадносінах) у Магілёўскай вобласьці — 5,9% ад колькасьці насельніцтва, а менш за ўсё — у Менску (1,2%). Для параўнаньня: у Берасьцейскай вобласьці гэты паказчык складае 5,5%, у Гомельскай — 5,4%, у Віцебскай — 5,1%, у Горадзенскай — 3%, а ў Менскай — 2,8%.
У Менску на пачатак году пражываў 1 995 471 чалавек. Калі зыходзіць з гэтых зьвестак, дык за рысай беднасьці было каля 24 тысяч жыхароў сталіцы.
На праблему малазабясьпечаных раней зважалі прафсаюзы. У фэдэрацыі прафсаюзаў заяўлялі, што ў некаторых раёнах сярэдняя зарплата не дазваляе насельніцтву рабіць пакупкі і аплачваць паслугі ў межах мінімальнага спажывецкага бюджэту.
На 1 студзеня гэтага году насельніцтва Беларусі складала 9 200 617 чалавек.
