У Менскім гарадзкім судзе 28 красавіка Франчука асудзілі на тры гады калёніі ва ўмовах агульнага рэжыму нібыта за распальваньне варожасьці, а таксама ў арганізацыі і падрыхтоўцы дзеяньняў, якія груба парушаюць грамадзкі парадак, альбо актыўным удзеле ў іх (ч. 1 арт. 342 КК).
Праваабаронцам «Вясны» стала вядома, што 13 траўня ў судзе Бабруйскага раёну і гораду Бабруйску адбудзецца разгляд крымінальнай справы супраць Франчука паводле арт. 368 КК (абраза Лукашэнкі). Працэс будзе весьці судзьдзя Вольга Серакова.
Сяргей Франчук — стрыечны брат намесьніка камандзіра палку Кастуся Каліноўскага Вадзіма Кабанчука. Франчук мае трэцюю групу інваліднасьці.
За што судзяць сваякоў каліноўцаў
Праваабаронцам «Вясны» стала вядома пра ціск на сваякоў намесьніка камандзіра палку Каліноўскага Вадзіма Кабанчука з боку беларускіх сілавікоў.
Першай ахвярай ціску стаў 32-гадовы стрыечны брат Вадзіма Сяргей Франчук. Як паведаміла «Вясьне» маці Вадзіма Таісія Кабанчук, яго забралі з кватэры бацькоў у Бабруйску, дзе ён жыў апошнім часам. 9 жніўня, калі бацькі Сяргея былі на лецішчы, 5 чалавек зь менскага АМАПу ўварваліся ў кватэру, ударылі Сяргея Франчука пісталетам па галаве, правялі ператрус, забралі мабільны тэлефон, ноўтбук і самога Сяргея.
Яму выставілі абвінавачаньне паводле арт. 342 Крымінальнага кодэксу Беларусі («Арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх»).
Сілавікі запісалі «пакаяльнае» відэа зь Сяргеем Франчуком, дзе ён кажа, што ўдзельнічаў у акцыях пратэсту 2020 году і пісаў камэнтары ў «экстрэмісцкіх» тэлеграм-чатах. На відэа відаць, што лоб у Сяргея заклеены.
Таксама на допыт у КДБ выклікалі стрыечную сястру Вадзіма Кабанчука з мужам. У іх таксама распытвалі, што яны ведаюць пра Вадзіма.
Многія беларусы з пачатку вайны сталі на абарону Ўкраіны, сфармаваліся полк Каліноўскага і полк «Пагоня», таксама беларусы ваююць у шэрагах УСУ. Па падліках штабу Ціханоўскай, на баку Ўкраіны ваююць каля 1500 беларусаў.
