Сайт «Медыязона» даведалася падрабязнасьці, што адбываецца з Алінай Горававай пасьля затрыманьня.
З выпускнога балю ў РАУС
20-гадовую Аліну Гораву затрымалі 27 сакавіка — у дзень, калі яна атрымала дыплём геадэзіста на выпускным у барысаўскім філіяле БНТУ. Напярэдадні яна здала дзяржаўныя экзамэны. Гораву выклікалі ў Круглянскі РАУС 17 сакавіка «для дачы тлумачэньняў».
Знаёмыя Аліны расказалі, што супрацоўнікі міліцыі задавалі ёй пытаньні аб падзеях жніўня 2020 года і паказвалі відэа і фота з маршаў у Менску. Тады пасля «гутаркі» студэнтка вярнулася ў Барысаў і рыхтавалася да выпускных іспытаў, якія пачыналіся 20 сакавіка.
«Перад другім дзяржэкзамэнам ёй пачаў тэлефанаваць сьледчы: «Вам трэба зьявіцца для дачы паказаньняў». Яна адказала, што ўжо была. Сьледчы: «Тое былі тлумачэньні, а гэта — паказаньні», — расказваюць знаёмыя Горавай.
Ёй далі час здаць іспыты — Горава сказала, што ня зможа прыехаць раней. Сьледчы пагадзіўся пачакаць да выпускнога. У дзень выпускнога сьледчы назвоньваў дзяўчыне цэлы дзень, таму ёй давялося пасьля атрыманьня дыплёма адразу ехаць у Круглае. Сьледчы ўдакладніў час прыбыцьця электрычкі з Барысава, на якой Горава павінна была прыехаць, і сустрэў яе на вакзале. Праз 10 хвілін студэнтка змагла патэлефанаваць блізкім і паведаміць, што затрыманая.
Як паведамляюць праваабаронцы, у гэты дзень у Круглым прайшло некалькі затрыманьняў. Затрымалі былога галоўнага санітарнага доктара Аляксея Цыганава, Улада Лагуценку і Аліну Гораву.
«Піелянэфрыт? Ну і што?»
Гораву адправілі ў Круглянскі ІЧУ на 72 гадзіны. Увечары 30 сакавіка перад пераводам у Магілёўскае СІЗА ёй выклікалі хуткую, паведаміў магілёўскі праваабарончы рэсурс MAYDAY TEAM.
Знаёмыя Аліны пазьней даведаліся, што ў яе была высокая тэмпэратура ў ізалятары, адбылося абвастрэньне хранічнага піелянэфрыту. У дзяўчыны таксама ёсьць хранічныя гінэкалягічныя захворваньні, мочакаменная хвароба, міжпазваночныя грыжы. Ад холаду ў камэры ўсе захворваньні абвастрыліся. Мэдыкі хуткай дапамогі прапаноўвалі шпіталізаваць Гораву, але яна нібыта адмовілася, растлумачыўшы гэта тым, што яе пераводзяць у СІЗА, а там ёсьць фэльчар.
«Тры дні ні адвакат, ні сваякі не ведалі, дзе яна знаходзіцца. Перавод у Магілёў выпаў на выходныя. І толькі ў панядзелак высьветлілася, што яна ў магілёўскай „чацвёрцы“».
Аліна доўгі час лячыла хранічныя захворваньні, але пасьля трох дзён у ІЧУ лячэньне давядзецца пачаць з нуля, расказалі знаёмыя семʼі.
Фэльчару турмы перадалі дакумэнты з мэдкарты Горавай з дыягназамі і вынікамі апошніх абсьледаваньняў. Аднак, па словах знаёмых сямʼі, фэльчар адказаў: «Піелянэфрыт? Ну і што? Зь ім людзі жывуць. Антыбіётыкі не дазволены». У СІЗА дзяўчыне зрабілі аналізы, якія паказалі запаленчы працэс. Аднак лячэньне так і не прызначылі.
Па словах знаёмых Аліны, блізкія плянуюць перадаць у СІЗА мэдыцынскія дакумэнты, якія даказваюць, што ёй патрэбна лячэньне і шпіталізацыя. На днях стала вядома, што ёй «робіцца горш», пачаліся крывацёкі, запаленьне прагрэсуе.
На 10-ы дзень зьняволеньня сьледчыя выставілі абвінавачаньне: грубае парушэньне грамадзкага парадку. Максымальнае пакараньне па гэтым артыкуле — 4 гады калёніі.
