Больш за 170 чалавек, у тым ліку 72 зь іх — у Парыжы, затрымалі падчас акцыі пратэсту супраць пэнсійнай рэформы ў Францыі. Каля 150 паліцыянтаў атрымалі раненьні падчас сутыкненьняў пратэстоўцаў зь сіламі правапарадку 23 сакавіка, піша DW.
Акцыі пратэсту прайшлі ў шэрагу гарадоў краіны. У сталіцы Францыі дэманстранты падпалілі кучы сьмецця, якія назьбіраліся ў гістарычным цэнтры гораду. Акрамя таго, некалькі сотняў апранутых у чорнае радыкальна настроеных пратэстоўцаў разьбівалі вітрыны банкаў, крам і пунктаў грамадзкага харчаваньня, а таксама ламалі вулічную мэблю. Паліцыянтаў закідвалі бутэлькамі, пэтардамі і камянямі. Праваахоўнікі ўжывалі супраць дэманстрантаў сьлезацечны газ і атакавалі натоўп дубінкамі.
Па словах міністра ўнутраных спраў Францыі Жэральда Дарманена, толькі ў Парыжы было зафіксавана каля 140 падпалаў. Ён абвінаваціў у гвалце «галаварэзаў», якія прыехалі ў сталіцу, «каб напасьці на паліцыянтаў і грамадзкія будынкі». Пажары былі ўчынены пратэстоўцамі і ў іншых гарадах. Так, у Бардо дэманстранты падпалілі дзьверы ў будынак мэрыі.
Па дадзеных МУС Францыі, 23 сакавіка ў маніфэстацыях па ўсёй краіне прынялі ўдзел каля 1 089 000 чалавек. У Парыжы на вуліцы выйшлі каля 119 000 дэманстрантаў. Прадстаўнікі прафсаюзаў заявілі аб 3 500 000 пратэстоўцаў ва ўсёй Францыі і 800 000 чалавек у сталіцы. Яны заклікалі да працягу мірных акцый пратэсту.
Рэформа ў абыход парлямэнту
Пэнсійная рэформа, якую абяцаў Эманюэль Макрон і якая выклікала масавыя пратэсты ў Францыі, прадугледжвае паэтапнае павышэньне пэнсійнага ўзросту з 62 да 64 гадоў да 2030 году, а таксама павышэньне мінімальнай пэнсіі да 1200 эўра. Яна была прынята ўрадам у абыход парлямэнту. Для гэтага ён зьвярнуўся да асаблівага артыкулу францускай канстытуцыі.
Прафсаюзы лічаць пэнсійную рэформу несправядлівай і неапраўдана жорсткай і заклікаюць правесьці рэфэрэндум на гэтую тэму. Паводле дадзеных апытаньняў, супраць зьмен, прапанаваных урадам, выступаюць дзьве траціны французаў.
А што ў Беларусі
Пэнсійная рэформа, распачатая ў Беларусі ў 2017 годзе, працягнецца да 2025 году, паведаміла ў студзені 2023 году Міністэрства працы і сацыяльнай абароны Беларусі. І калі ў 2022 годзе пэнсійны ўзрост дасягнуў свайго максымуму — 58 гадоў для жанчын і 63 гады для мужчын — і пакуль больш не расьце, то ўсе астатнія парамэтры працягваюць расьці.
Сярод гэтых парамэтраў, напрыклад, страхавы стаж — час, за які арганізацыя, дзе працуе работнік, выплочвае за яго ўнёскі ў Фонд сацыяльнай абароны насельніцтва. Калі ў 2022 годзе страхавы стаж быў роўны 18,5 года, дык з 1 студзеня 2023 году ён вырас на паўгода — да 19 гадоў. У 2024 годзе для выхаду на пэнсію па ўзросьце трэба будзе мець 19,5 года страхавога стажу, у 2025-м — 20 гадоў.
Калі страхавы стаж расьце штогод на паўгода, то заробак, зыходзячы зь якога вылічаецца пэнсія, кожны год павялічваецца на адзін год. У 2023 годзе гэты паказчык складзе 29 гадоў (у 2022 годзе быў 28), у 2024 годзе будзе 30 гадоў, у 2025 — 31 год. Гэта значыць, што ў 2023 годзе чалавек, які выходзіць на пэнсію, павінен падаць даведкі аб заработнай плаце зь месцаў, дзе ён працаваў 29 апошніх гадоў.
