Мясцовы жыхар Уладзімер Панцюх на аўтавакзале пачаў здымаць дзеяньні супрацоўнікаў ДАІ, якія правяралі маршруткі. Панцюх палічыў, што даішнікі паводзілі сябе нахабна і хамілі кіроўцам. Як толькі супрацоўнікі ўбачылі тэлефон, адразу падбеглі, павалілі мужчыну на зямлю і павезьлі яго ў аддзел міліцыі, піша «Вясна».
Пазьней зьявіліся відэазапісы затрыманьня Ўладзіміра Панцюха. На першым відэа бачна, што мужчына не распачынаў ніякай бойкі, а проста здымаў дзеяньні супрацоўнікаў ДАІ. На другім відэа зафіксаваны сам момант затрыманьня — мужчыну з 3 групай інваліднасьці білі па нагах, а потым павалілі на зямлю.
Паводле інфармацыі праваабаронцаў, праз гадзіну затрыманага мужчыну прывезьлі ў рэанімацыю з сардэчным прыступам і сьлядамі зьбіваньня. Цяпер Панцюх знаходзіцца ў шпіталі пад канвоем. У яго трэцяя група інваліднасьці. Раней ён неаднаразова пераносіў інфаркты і апэрацыі на сэрцы.
Мужчыну чакае суд, паводле якога артыкулу, пакуль невядома.
Вэрсію інцыдэнту сілавікоў таксама пераказвае «Вясна». Паводле міліцыянтаў, Панцюх нібыта быў у нецьвярозым стане і распачаў бойку на вакзале, за што яго затрымалі.
