Генэральны сакратар ААН Антонію Гутэрыш 27 лютага ў Жэнэве выступіў на адкрыцьці сэсіі Рады ААН па правах чалавека.
Ён зьвярнуў увагу на абуральныя парушэньні парушэньні Расеяй правоў чалавека ва Ўкраіне, піша DW. Паводле ягоных слоў, разьвязаная Масквой агрэсіўная вайна прывяла да самых масавых парушэньняў правоў чалавека ў цяперашнія часы.
Вайна Расеі супраць Украіны, якая пачалася год таму, прывяла да гібелі людзей, разбурэньняў і перамяшчэньня асоб у вялікім маштабе. Удары па мірных жыхарах і грамадзянскай інфраструктуры пацягнулі за сабой шматлікія ахвяры і жудасныя пакуты. Упраўленьне Вярхоўнага камісара ААН па правах чалавека задакументавала дзясяткі выпадкаў сэксуальнага гвалту, адзначыў Генэральны сакратар ААН.
Антонію Гутэрыш таксама паведаміў аб грубых парушэньнях нормаў гуманітарнага права, у прыватнасьці, аб жорсткім абыходжаньні з ваеннапалоннымі і выкраданьнях цывільных асоб.
Чакаецца, што падчас сэсіі кіраўнік Камісіі па расьсьледаваньні падзей ва Ўкраіне Эрык Месе выступіць з дакладам, у якім прадставіць доказы ўчыненых расейскімі салдатамі ваенных злачынстваў. Чакаецца, што сэсія адобрыць падаўжэньне мандата камісіі.
Сёньня ж стала вядома аб новай ініцыятыве Эўракамісіі ў сувязі з вайной ва Ўкраіне. Разам з Польшчай яна мае намер расьсьледаваць выпадкі вывазу ўкраінскіх дзяцей у Расею, з мэтай знайсьці вывезеных і прыцягнуць да адказнасьці вінаватых у іх выкраданьні. Пра гэта паведамляюць Deutsche Welle і Польскае радыё. Улады Ўкраіны і шэрагу іншых краін абвінавачваюць Расію ў дэпартацыі дзяцей з акупаваных тэрыторый.
