«Стала вядома, што 31 студзеня ў выніку абстрэлу Бахмута Данецкай вобласьці загінуў 12-гадовы хлопчык», — удакладнілі ў ведамстве.
Яшчэ сама меней 919 дзяцей атрымалі траўмы рознай ступені цяжкасьці.
У пракуратуры адзначылі, што прыведзеныя лічбы — не канчатковыя, ідзе праца па іх устанаўленьні ў месцах вядзеньня актыўных баявых дзеяньняў, на акупаваных і вызваленых тэрыторыях.
Паводле зьвестак Офісу генпракурора Ўкраіны, з прычыны бамбардаваньняў і абстрэлаў узброенымі сіламі Расеі ва Ўкраіне пашкоджаныя ўжо 3126 навучальных установаў, 337 зь іх разбураныя цалкам.
Упраўленьне вярхоўнага камісара ААН па правах чалавека пацьвердзіла 7110 выпадкаў гібелі і 11547 выпадкаў раненьня мірных жыхароў ва Ўкраіне ў выніку поўнамаштабнага ўварваньня Расеі. Гэта зьвесткі, сабраныя з 24 лютага да 29 студзеня.
Толькі за студзень (з 1 па 29 студзеня) ведамства зафіксавала 170 выпадкаў гібелі і 506 — раненьняў цывільных ва Ўкраіне.
У арганізацыі адзначаюць, што рэальная колькасьць загінулых значна вышэйшая, паколькі атрыманьне інфармацыі зь некаторых месцаў, дзе працягваюцца інтэнсіўныя баявыя дзеяньні, адбываецца з затрымкай, і многія паведамленьні ўсё яшчэ маюць патрэбу ў пацьвярджэньні.
